Ivigaasanik arsaattarfiit arfineq-marluk Sermersuumi pilersinneqalersut
Aviisi Nordjyske Stiftstidende taama allaaserisaqarpoq. Taakku Frederikshavnimi suliffeqarfik Wellness Group A/S oqaloqatigisimavaat. Suliffeqarfik taanna Kommuneqarfik Sermersuumik isumaqatigiissusiorsimavoq ivigaasanik arsaattarfiliortoqarnissaa pillugu isumaqatigiissusiorsimallutik.
Arsaattarfiit angivallaanngitsut sisamat anginerlu ataaseq Nuummi pilersinneqassapput, Paamiunilu angineq ataaseq. Ittoqqortoormiini arsaattarfik arfineq-pingasuuttariaq angivallaanngitsoq aamma pilersinneqassaaq.
- Suliassaq imaannaanngitsoq. Atortussat 1000 tonsingajaat Danmarkimit Kalaallit Nunaanni umiarsualivinnut pingasunut assartornissaat eqqarsaatigalugu piareersagassat assigiinngitsut amerlassaqaat, Martin Høgh, Wellness Groupimeersoq Nordjyske Stiftstidendemut oqarpoq.
Aamma atuaruk Kommuneqarfik Sermersuumi ivigaasanik arsaattarfiit arfineq marluk nutaat
Arsaattarfiillu ukioq manna piareerneqarnissaat pilersaarutaavoq:
- Sivikitsuinnarmik aasaasarnera eqqarsaatigalugu juulimilu aggustimilu ulapittussaassaqaagut, Ittoqqortoormiinili arsaattarfissap ukioq manna piareersimanissaa pilersaarutaavoq, naak umiarsualivimmut aatsaat juulip naalernerani talissinnnaalluta, Martin Høgh oqarpoq.
Tasiilami arsaattarfik sanaartugassanut atortussanik toqqorsiviummat ivigaasanik arsaattarfimmik ukioq manna pilersitsisoqarsinnaanngilaq, meeqqanummi paaqqinnittarfissap sananeqarnissaa pillugu sanaartornermut atugassanik tassani toqqorsiveqarami.
- Paaqqinnittarfilli sananeqareerpat atortussallu peerneqareerpata, taava ivigaasanik tamaani aamma arsaattarfeqalerumaarpoq, Kommuneqarfik Sermersuumi borgmesteri Asii Chemnitz Narup KNR-imut oqarpoq.