Issittup qiterpasissortaani tuttoqassuseq affaannanngortoq

Tuttut Issittup qiterpasissortaanniittut 2010-mi 70.000-iusimapput, 2013-imi 50.000-it missaanniipput. Alaskamilu uumassusilerisut maanna nalunaarutigaat, tuttut maanna 22.000-it missaanniittut. Uumassusilerisullu tuttut ukiuni kingullerni ikiliartupiloornerat oqaaseqarfigisinnaanngilaat.

Tuttut ikilipiloornerannut piniarnerit kiisortullu pisuussutiginngikkaat, Alaskap aalisarnermut piniarnermullu naalakkersuisoqarfiani uumassusilerisuusup Beth Lenartip oqaatigaa. Tuttut nerisaqartarnerannut tunngaviusoq tamatumani peqqutaasinnaasoq oqaatigineqarpoq. Beth Lenartillu oqaatigaa, kulavaat akornanni toqorarnerit nalinginnaasumit amerlanerusut tamannalu peqqutaasinnaasut ilagaat.

Issittup qiterpasissortaani tuttut uumaffigisaat, Qeqertarsuup angissusaata 13-eraarteraat tassalu 113.000 kvadratmeterinik angissuseqarluni. Alaskami aalisarnermut piniarnermullu naalakkersuisoqarfiup missiliorpaa, tuttut Issittup qiterpasissortaaniittut 28.000-it 32.000-illu missaanniittut.