Oqalliseqataasartoq: ”Kalaallit Nunaannut Juullimi inuulluaqqussut” pisoqaavallaalerpoq
- Aallakaatitassiap nuannarineqarnera paasilluarsinnaavara, aamma tunngaviatigut DR-ip taamatut tunniussaqarnera kusanarpoq. Nutaanngorsartariaqarporli. Ukiummi tamaasa ullormi ataatsimi qanga pissutsit atugaasimasut takutittarpagut.
Kalaaleq oqalliseqataasartoq Danmarkimi najugalik peqatigiiffik Naalagaaffeqatigiinnermilu siulittaasoq, Nauja Lynge, aviisimi Jyllands-Postenimi pingasunngornermi taama oqarpoq.
Taanna isumaqarpoq Danmarkip Radioata Kalaallit Nunaannut juullimi inuulluaqqussutaa 1932-mili ingerlasoq aallakaatinneqaraangat qimussit, puisinniat kalaallisoortullu tunuliaqutigisarnerat Kalaallit Nunaannut isiginnittaatsimik pisoqaavallaartumik nikinneqanngitsumillu danskinut takutitsisartoq.
AAMMA ATUARUK Nunatsinnut juullimi inuulluaqqusineq 85-issaannik aallakaatinneqassaaq
Kalaallit Nunaat kalaallillu Danmarkimiittut ukiumut ataasiaannaq saqqumilaartiinnarnagit sammineqarnerat ukiup sinneranut siammarneqartariaqarpoq, Nauja Lynge taama isumaqarpoq.
Danmarkilli Radioani aliikkutassaqartitsinermut pisortap Jan Lagermand Lundmep ukiumoortumik aallakaatitsisarneq illersorpaa.
- Aallakaatitassiaq aliikkusersuineriinnaanngilaq. Taamaammat aamma ukiut ilaanni aallakaatitassiaq tamakkerlugu Kalaallit Nunaannit aallakaatipparput inuiaqatigiit qanoq nutaaliaatiginersut takutikkumallugu. Allangoriartornerit Kalaallit Nunaanni atugaasimasut annertuupilussuit aamma sammivagut. Aamma aallakaatitassiap siunerataa attaveqarnissap qanoq pingaaruteqartiginera ersersissallugu, Jyllands-Postenimut taama oqarpoq.
AAMMA ATUARUK DR-ip Kalaallit Nunaannut juullimi inuulluaqqussutaa Katuami immiunneqassaaq