”Inuuneritta” nassuiaateqarfigineqarpoq

Peqqinnerulernissarput anguniarlugu suliniutissaq ”Inuuneritta”, Pisortaqarfinni arlalinni suleqatigiilluni ingerlanneqartussaq, Peqqissutsimut Naalakkersuisup Asii Chemnitz Narupip, Inatsisartut ippassaq ataatsimiinneranni nassuiaateqarfigaa. Suliniutissaq Inatsisartut ukiaru ataatsimiilerpata isummerfigineqassaaq. ”Inuuneritta” pillugu erseqqarinnerusumik nassuiaasoqarnissaanik Inatsisartuni ilaasortat arlallit ujartuipput. Peqqissutsimut Naalakkersuisoq Asii Chemnitz Narup pingaartitat ima eqqaavai:

-Maluginiarpara saqqummiussatsinnut tunngaviatigut tamakkiisumik tunuliaqutsiisoqartoq inatsisartunit tamanit. Pingaartissimavarput saqqummiutissallugu pissutsit ullumikkut peqqissutsitsinnut ulorianartorsiortitsinerpaat suunersut. Tamaattumik qulequttat taakku sisamat immikkoortissimavagut.

Inatsisartuni ilaasortat arlallit suliniutissaasinnaasunik allanik taakkartuipput. Tamanna tupiginngikkini Asii Chemnitz Narup oqarpoq.

- Soorunami ilanngullugit oqimaalutarlugillu nalilersussavagut, soorlu innuttaasut siunnersuutigisimasaanni aamma taamaaliorsimasugut.

Suliniutini suniluunniit pingaarnersiuineq avaqqunneqarsinnaanngitsoq aamma erseqqissaatigaa.

- Naalakkersuisuni ilaasortaaninni misilittagamininnguakka imaapput: Kissaatigut 100 procentimik, tamakkiisumik, naammassisinnaasanngilagut aningaasaliissutaasut aamma aalajangeeqatasarmata.

Erseqqissaatiga aningaasaliissutaasut aalaakkaasut iluini suliniutigerusutat tamaasa naammassisinnaanngikkitik.

- Taamaattumik immikkut ittumik aningaasaliisoqartariaqarpoq. Peqqinnerulernissarput pimoorullugu periarfississagutsigu, aningaasanik naleqarmat nukinginnarmallu massakkut immikkut ittumik sulinianngikkutta inuit peqqiilliortussat aamakorpassuit.

Peqqinnerulernissarput anguniarlugu suliniutissap ”Inuuneritta”-p ukioq manna 2006-imiit 2012 ilanngullugu ingerlanneqarnissaa pilersaarutaavoq.