Øystein Slettemark aallaammik arsaarneqarpoq

Kalaaleq sisorarluni ooqattaasartartoq Øystein Slettemark aallaamminik Spaniami arsaarneqarpoq, Tysklandimilu sapaatip-akunnerani EM-imik unammeqataasinnaanera nalunarsivoq.

Øystein Slettemarkip ilaquttanilu Spaniamut angalanerminni ooqattaarsarluni aallaat atortakkani nassarpaa. Angerlarnialerlutilli aallaamminik arsaarneqarpoq.

-Spaniami mittarfimmi nakkutilliisup aallaaseqarnissannik akuersissutiga danskisut allassimasoq nunatsinnilu politimesterip akuersissutaa akuererusunngilai, aallaasinnillu arsaagaavunga, Øystein Slettemark oqaluttuarpoq. Akuersissutini tiguniarsimagaluarpaa itigartitaallunili. Taamatut noqqaaneq qaammatini 14-ini paarnaarussivimmiititaanermik kinguneqarsinnaasoq paasitinneqarpoq.

Kalaallilli ooqattaasartartuat taama sivisutigisumik utaqqisinnaanngilaq, sapaatip-akunnerata tulliani Tysklandimi sisoraaserluni ooqattaasartoqassaaq, Øystein Slettemarkilu allamik aallaaserluni unammisinnaanngilaq. Aallaat immikkuullarissuuvoq saamiugamilu allamik unammissutissaminik imaaliallaannaq nassaarsinnaanani.

Folketingimi inatsisartunilu ilaasortamit Lars-Emil Johansenimit EM-imut arfinngorpat unammiartorluni aallannginnermini ikiorserneqarnissani kissaatigaa.

Øystein Slettemark aperaarput sooq aallaanni nassarsimaneraa imalu akivoq:

-Akuersissut malillugu aallaat inummut allamut tunniussinnaannginnakku nassarpara, Øystein Slettemark naggasiivoq.

Pilersaarutit malinneqassappata Øystein Slettemarkip EM-imi sisorarluni nunatsinniit ooqattaasaqatigissavai Martin Møller, Johanne Mikkelsen aamma Christian Christoffersen.