Østrigimi ministeri: Wienimi aallaasersorluni saassussisoq IS-imik tapersersuisuuvoq

Peqqarniisaarniat Østrigip illoqarfiisa pingarnersaanni Wienimi ataasingornermi unnukkut aallaasersormata inuit tallimat toqutaapput, taakkunannga saassussisoq ataaseq. Saassussisut akornanni ikinnerpaamik ataaseq peqqarniisaarnianik Islamisk Statikkunnik tapersersuisuuvoq.

Østrigip nunamut namminermut ministeria Karl Nehammer, tusagassiortunik ullaaq manna marlunngornermi katersuutsitsinermi taama ilisimatitsivoq.

Østrigimi oqartussat saassussisup najugarisaani misissuereerlutik taama inerniliipput. Østrigimi nutaarsiassaqartitsivik APA marlunngornermi taama allappoq.

Wienip qiterpasissuani ataasinngornermi unnukkut saassussisoqarpoq, sumiiffinni assigiinngitsuni arfinilinni aallaasersortoqarluni. Juutit qinusarfiisa ilaannut qanittumi saassussisoqarpoq.

Saassussisut amerlanerusimasinnaassangatinneqartut

Toqutaasut tassaapput angutit marluk arnallu marluk. Taakkualu saniatigut saassussisoq ataaseq politiinit aallaaneqarluni toqutaavoq.

14-it aqqunartitingaatsiarput, taakkunannga politeeq ataaseq.

Saassussisutut pasineqartoq politiinit aallaaneqarluni toqutaasoq aallaasimik eqittaannakkamik tigummiaqarpoq, illuinnarsuutit arlallit aamma paaralugit, qaartartuunasorisamillu aamma qitermioqarluni. Qaartartuunngitsorli kingorna paasineqarpoq.

- Saassussisut amerlanerusimasinnaanissaat ernummatigisinnaavarput, nunamut namminermut ministeri oqarpoq.

Wienip qiterpasissuani aqqusernit arlallit politiinit ataasinngornermi unnukkut unnuarlu saasussisut ujaarineqarneranni assersorneqarput.

Bussit qimuttuitsullu uninnganeranni inuit imerniartarfinnut akunnittarfinnullu saassussisoqarnerani qimarrapput.

Nunat assigiinngitsut Wienimi saassussinerit akuersaarneqarsinnaanngilluinnartutut taallugit Østrigimiut misigineqatigaat, danskit ministeriunerat Mette Frederiksen taakkununnga ilaalluni.