Ánorâk Filmip filmiliai marluk CPH:DOX takutinneqalersut

Europami filminik piviusulersaarutinik festivaalit pingaarnersaasa ilaat - CPH:DOX - Københavnimi aallartissaaq. Tassanilu kalaallit filmiliornermik ingerlatsiveqarfianit Anorak Filmimit filmiliat marluk pisortatigoortumik pisussat allattorsimaffianni ilaapput.

Filmi “Håbets Ø”  - “Neriunnerup Qeqertaa” - Maniitsumik ilisarititsisoq nunarsuarmi takutinneqaqqaassaaq. Ukiut arlallit matuma siornatigut aluminiummimik Alcoap suliniutaa annertooq isumalluarfigineqaqisoq illoqarfiup innuttaanut qanoq sunniuteqarsimanersoq filmip imaraa.  

Maniitsumi isumalluarluni qiimmatsanneq kisianni aamma Alcoamik suliniut nipaatsumik taamaatiinnarneqarmat pakatsineq neriuutissaaruttuusinerlu malinnaaffigineqarput.

- Namminersulivinnissaq pillugu takorluuinermik filmi kusanartoq ilunngunartumillu alianaatsoq, Anorak Film taama allappoq Håbets Ø - Neriunnerup Qeqertaa -  pillugu. Filmi kalaallit, qallunaat Norgemiullu filmiliortut suleqatigiissutigalugu filmiliaraat.  

Anorak Filmillu festivaalimut CPH:DOX-imut ilaatitaassa aappaat - Aquarela - suli amerlanerusunit suleqataaffiuvoq.

Filmiliornermi pisortaavoq filminik ilitsersuillammassuaq Viktor Kossakovsky, ilaatigut Skotlandimit, Tysklandimit, USA-mit aammalu nunatsinnit filmiliortunik suleqateqarluni.

Filmimi imeq sammineqarpoq. Nunarsuup erngi pillugit assitigut suliaavoq alutornartorsuaq.

Sermillumi  sammineqarput - ilitsersuisup nunarput tikeraarpaa, Anorak Filmillu tunulequtai marluk, Inuk Silis Høegh aamma Emile Hertling Peronard, suleqatigalugit sermimik manngertumik aakkiartortumillu tupinnartunik assiliorsimalluni.

Aquarela siorna Venedigimi filminik festivaaleqarnermi nunarsuarmi takutinneqaqqaarnermini assut aalassassutigineqarpoq, aatsaalli Danmarkimi takutinneqartussanngorluni. 

Filmillu taakku tamarmik ukioq manna kingusinnerusukkut nunatsinni takutinneqaqqaassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat