Naja P aamma Bent Ole Brandt Koda Awardsimi ajugaapput: - Nunatsinni nipilersullaqqeqaagut
Nalliuttorsiorpalaartoqarlunilu qiimmisaartoqarluarpoq arfininngornermi Katuami nipilersornerup iluani Koda Award imik ukiumut ataasiarluni pisartumi nersuinninniartoqarnerani, matumanimi nipilersortartut marluk nersorniarneqarput.
Ukiumut nersornaat Naja P-mut tunniunneqarpoq taassumami erinnaq EP-tut immiussaq "Naasunnguusunga" innersuunneqaatigaa, taamalu SIGU-p erinaq innersuunneqaatigisaa taassaalluni: "Ujartaraat Qaamaneq" aammalu Andachanimit erinaq elektroniskiusoq EP-tullu immiussaasoq ”Seeyousoon” aamma innersuunneqarput.
Bent Ole Brant takkede sine medmusikere på scenen i Katuaq. Foto: Katuaq.Naja Parnuuna Katuami ukiumut nersornaammik tunineqarami nuannaaqaaq.
- Qanoq oqassallungaluunniit naluara, ingasaqaaq, nuannaaqaanga pilluaqaanga qamuuna, 22-nik ukiulik Naja Parnuuna Vahl Olsen oqarpoq taassuma eqqumiitsuliortutut taaguutigaa Naja P.
Nipilersortartunut immiussisartoq
Nipilersortartoq immiussisartorlu Bent Ole Brandtip ataqqinaammik nersornaat pivaa, taannami nunatsinni nipilersortartut silarsuaanni sunniuteqarluarsimasutut taaneqarpoq.
Bent Ole Brandt killitsissimasoq takuneqarsinnaavoq:
- Siunertarinngikkaluarpara nersorniarneqarnissara, kulturili pillugu kivitseqataanissara pillugu suleqataasarsimavunga, Bent Ole Brandt qujaniarluni oqalugiarnermini taama ilaatigut oqarpoq nangipporlu:
- Nipilersortartorpassuit nipilersoqatigisarsimavakka taakku ilarpassui toqukkut qimagutereerput, taakkoqanngippalli manna angunavianngikkaluarpara, Bent Ole Brandt oqarpoq.
Bent Ole Brandt aamma Naja Parnuuna Vahl Olsen tamarmik immikkut 25.000 kr.-nik tunineqarput.
Naja P aamma Andachan, ukiumoortumik nersornaammut tamamik innersuunneqarput Ass: Katuaq.
Nunarsuaq takutissavarput
Naja Parnuuna Vahl Olsenimut nersornaat kajumilersitsivoq.
- Ukiumoortumut nersornaat pisinnaagukku aamma allanik erinnanik suliaqaqqissinnaavunga, taanna KNR-mut oqarpoq.
Taannami maanna aamma aallartereerpoq.
- Nunatsinni nipilersortartut, isiginnaartitsisartut eqqumiitsuliortullu pikkoreqaat, nunarsuarmioqatigullu takutittariaqarpagut, taanna oqarpoq.
Nersornaasiineq arfininngormat KNR-TV-kkut aallakaatinneqarpoq.
