Ilitsersuut: Avaleraasartooq pujuugaq, tun siataq kuanninillu fromagea

Peter Berthelsen & Amalia Hansen

 

Siuleqqiut:

Avaleraasartooq pujuugaq

Tomatconcasse
Mannik aalallugu issortitaq
Iffiaq sikataq
Seernat 


Avaleraasartooq 16 timit taratsumiitinneqareerpat pujoorneqassaaq. 
Tomatip naqqa krydsimik putoneqassaaq, imermilu qalaartumi 15-20 sekunder tupatseriarlugu, imermut sikulimmut ikineqassaaq, nillorserlugulu. Ameerneqassaaq, imaajarneqarlunilu. Sinneruttoq amitsunnguanngorlugu, kipparissuaranngorluguluunniit aggorneqassaaq, pujuukkamut pinnersaatigineqassaaq
Mannimmut ataatsimut (60 gr miss) aalaterunneqassaaq 20 gr. Immuup qalipaa, akulerulluarlugu. Igaaqqami aalatiinnavillugu issornissaa tikillugu uunnanneqassaaq.
Iffiaq kipparissuaranngorlugu aggoriarlugu punnermut sianneqassaaq


Aalisakkamit qajuliaq

200  gr aalisakkap saarni
Uanitsut marluk
Gulerod ataaseq
Porre ataaseq
Knoldselleri 100 gr miss. 
Hvidløg fedit marluk
Mulequt pilutaq ataaseq (laurbær)
Qasilitsut aserorterneqanngitsut qulit
Imeq 2 liter


Suppiliassat  imermut qalaartinneqareepata  aalisakkap saarngi akulerutissapput 20 minutsillu qalaartillugit. Qajorlaajarneqassapput naggataatigullu qajoq nakkartinneqassaaq.


Tun siataq 

Inummut ataatsimut 180 gr.
Tunip nerpia siatsivimmi uuliamut punnermulluunniit kissartumut  2-3 min. illugiillugu  sianneqassaaq, tamatumalu kingorna 2 min. uninngatinneqassaaq.

 

Naatsiiat aserortilaakkat

200 gr (inummut ataatsimut)
1 dl immuk
50 gr. Punneq
Taratsut qasilitsullu
Qajaasat


Naatsiiat qalipaajakkat qalanneqassapput. Immuk punneq qajaasallu 10 min. sallaatsumik  qalaartinneqassapput. Taava naatsiiat sallaatsumik aserorterneqassapput immummik qajaasalimmik akullattaajutigalugit. Taratserlugillu qasilitsulerneqassapput, purløginillu killukkanik pinnersarneqarlutik.

 

Ruubiiat 

Ruubiiat qalipaajarneqassapput tamuaanngorlugillu agoorneqarlutik. Aalisakkap qajuanik kuineqassapput iffiorfikkullu 160 gradinut foliamik ulillugit uunneqassapput, aqilinissaat tikillugu.

 

Miseraq

Ruubiaat qaqinneqassapput skålimut ikillugit . Suppiliassat, soorlu uanitsut, guleruujut, porrit  aamma sellerit aggorneqassapput siatsivimmilu siallugit, annertussusaat ruubiat qajuannut naleqquttuussaaq.  
Suppiliassat siareerpata qajumik kuineqassapput – tamarmillu qalaartinneqassapput imerpalasup pingasorarterutaannanngornissaata tungaanut. Taamaalippat miserassaq nakkartinneqassaaq punnerlu nillertoq akulerunneqassaaq, iluarisamik kinissuseqalernissaanut.

 

Kinguleqqiut:

Kuanninit fromagea

75 gr sioraasat
50 gr Manniup aappaluttortai pasteuriseerikkat 
35 gr manniup qaqortortai pasteuriserikkat
2 gr kuannip pilutai panertitat aserorteqqissaakkat
Husblasit tallimat
625 gr immuup qalipaa


Sioraasat manniullu aappaluttortai qaqortortaalu kuannit pilutai panertut akuliullugit igamut aalaterneqassapput. Kissartumut sallaatsumik piskerneqassapput – kinilaartunngortillugu. 
Husblasit min. qulini imermi nillertumi aasusserneqassapput.
Aasuppata igaaqqamut uunnanneqassapput, qalaartinngivillugit. Taava nakkartitsivikkut husblas aannikoq aalatamut annikittunnguakkuutaarlugu akulerunneqassaaq. Taava aalataq immuup qalipaanut issortinnagu piskerneqarsimasumut akulerunneqassaaq, assigiiaartumik akuleruttunngorlugu.
Naammasippat formimut kuiuk timialuillu nillertumi uninngatillugu.


Paarnanit issortitaq

250 gr paarnat
½ l imeq 
100 gr sioraasat
Husblas qulit (Literimut ataatsimut)


Paarnat imilerlugit sioraasalerlugillu qalaarteriarlugit nakkartinneqassapput. Tassunga husblasit aasussimasut akulerunneqassapput. Aalataq nillorserneqassaaq inip iluanitulli kissassuseqalersillugu. Taamaalippat fromagiap qaavanut kuineqassaaq, issorsiillugulu.

 

Paarnanit tungusunnitsuliaq

1 dl paarnat 
1 dl imeq
30 gr sioraasat
Vanilie kanaartaq ataaseq imalt. Vanilie sukker.


Imeq, sioraasat vanilialu sukkup aannissaata tungaanut qalaartinneqassapput. Tamatumalu kingorna imerpalasoq paarnanut kuineqassaaq, nillorserlugulu.

 

TAKANNA!