Illiua KNR-Raatiumi pisortassarput

KNR-imi raatiup pisortassaanik pissarsiorpugut januarip aallaqqaataani 2020 imaluunniit ullormi allami isumaqatigiissutigineqartumi atorfinittussamik.

Raatiup pisortaata akisussaaffigaa raatiumi ulluinnarni aqutsineq inerisaanerlu KNR-imilu pisortaqatigiinnut ilaassalluni.

Raatiup pisortaata qaffasinnerusumik akisussaaffigai Innuttaasunut Sullissisussaaneq malillugu aaqqissuisutigut suliatigullu avammut saqqummersitsiviit assigiinngitsutigut aqqutigalugit saqqummiussat.

Tusagassiuteqarfiit sumi tamaaniittut ineriartupiloorput, tamatumalu malitsigaa allanngorartuarneq pissutsinullu piviusunut naleqqussartuarneq.

Taamaattumik

  • - raatiup tunniuttagaanik ineriartortitsillutillu pitsaassusaannik qulakkeerinnissaatit
  • - aaqqissuisoqarfinnik nukittuunik ullutsinnullu tulluuttunik suliassanut pikkorissulinnik nutaamillu eqqarsartunik pilersitsinnaatit
  • - qulakkiissavat raatiup immikkoortortaqarfia ingerlalluartoq erseqqissunik siunertaqarluni anguniagaqarsinnaasoq

Piginnaasat:

  • - Suliamut naleqquttumik ilinniagalik aqutsinermik misilittagalik periusissianillu ilisimasalik
  • - Siamasissumik tusagassiortutut raatiumilu sulianik misilittagalik
  • - Suleqateqarluarnissamik piginnaanilik, attaveqatigiinnermik pikkorissusilik sulisunillu atugarissaartitsinissamut kajumissuseqalersitsinnaanermillu qulakkeerinnissinnaassusilik
  • - Kalaallisut oqaatsitsinnik qaffasissumik atuisinnaaneq allattariarsornikkut oqalussinnaanikkullu, kiisalu danskit tuluillu oqaasiinik atuisinnaassusilik.

Akissarsiat atorfeqarnermilu atugarisassat

Akissarsiat atorfeqartitaanermilu atugassarititat kattuffiup susassaqartup Namminersornerullutik Oqartussanik isumaqatigiissutigisimasaat atorfininnerup nalaani atuuttut malillugit inisinneqassapput.

Ineqarneq

Atorfimmut atatillugu inissaqartitsisoqassanngilaq

Attaveqarfissaq aammalu sukumiinerusumik paasissutissanik paasiniaavissaq

Annerusumik paasisaqarusukkuit KNR-ip pisortaa Karl-Henrik Simonsen allaffigisinnaavat uunga khs@knr.gl 

Apeqqutit tamatigoornerusut sulisoqarnermut immikkoortortaqarfimmut saaffiginnissutigineqassapput ugguuna hr@knr.gl

Qinnuteqarnissamut piffissaq killigititaq

Qinnuteqarnissamut ulloq 15. December 2019 killiuvoq. Qinnuteqarnikut aggersarneqartarumaarput oqaloqatigiinnissamut. Qinnuteqaat sulerisimanermik, ilinniarsimanermik uppernarsaatinik, allanillu attuumassuseqartunik paasissutissanik imalinnik malitsilik uunga nassiunneqassaaq atorfik@knr.gl