Naalungiarsummik toqutsineq pillugu nassuiaasoqarnissaa noqqaassutigaa

Ilaqutariinnermut Inatsisinillu atortitsinermut naalakkersuisoq, Martha Lund Olsen (S), Qaqortumi sapaatit akunnerata siuliani naalungiarsummik toqutsineq sioqqullugu susoqarsimaneranik Kommune Kujalliup nassuiaateqarnissaanik noqqaassuteqarpoq.
11. September 2013 10:19

KNR-imit siornatigut oqaluttuarineqareersutut saniliusut arlallit naalungiarsuk pillugu ernumassuteqarnertik pillugu kommunimut attaveqarsimapput. Ataataasup ernerminik annersaasarnera arlaleriarlutik tusaasarsimallugu nassuiaatigisimavaat.

Kommune Kujalliup kingorna nalunaarutigaa, saaffiginnissutit qisuariarfigisimallugit suliarlu suliat allat assingalugit suliarisimallugu. Taamatulli nassuiaateqartoqarnera Martha Lund Olsenip naammaginartinngilaa.

-Susoqarpiarsimanersoq paaserusuppara. Taamaammat suliaq pillugu nalunaarusiortoqarnissaa noqqaassutiginiarpara.

Saniliusup Qanoruumut oqaluttuaraa maajip qaammataani saaffiginnissimalluni, qaammallu taanna aamma kingusinnerusukkut saaffiginneqqissimalluni. Kingorna arlaleriarlutik saaffiginnissimavoq, aggustillu qaammataani sanilini allat marluk peqatigalugit kommunimut allagaqarput. Saniliusut tamartmik oqaatigaat nalunaarutigisatik pimoorunneqanngitsutut misigisimallutik. Toqutsinerup alianartup pinngitsoortinneqarsimasinnaaneranik maanna misigisimapput.

Kommuni Kujallermili isumaginninnermut pisortap Mikkel Ballep alianartumik pinngitsoortitsimasimasinnaanertik ilumuunnginnerarpaa.

Martha Lund Olsen kommuni maannakkorpiaq isornartorsiorusunngilaa.

-Susoqarsimanera paasiniarlugu misissuisoqarnissaa utaqqimaartariaqarpaput, oqarpoq.