USA-mi toqumik pillaaserneqarsimasut ullup ataatsip ingerlanerinnaani toqunneqartut 2010-mili aatsaat taama amerlatigisut
USA-mi nunap immikkoortuini naalagaaffinni assigiinngitsuni toqutsisimasutut eqqartuussat pingasut, kapuut toqunartulik atorlugu sisamanngornermi toqumik pillaaserneqarsimasut toqunneqarput.
Nunami tassani ullup ataatsip ingerlanerani toqumik pillaaserneqarsimasunik toqutsinerit ukiut 15-it sinnerlugit ingerlaneranni aatsaat taama amerlatigaat.
Toqumik pillaaserneqarsimasutut eqqartuussat toqunneqarneri Tennesseemi, Oklahomami Alabamamilu naammassineqarput.
Anthony Hines 66-inik ukiulik Tennesseemi parnaarussivimmi isumannaallisakkami nakkutilliiffiulluartumilu Nashvillemiittumi toqunneqarpoq, pinerluuteqarsimasut naalagaaffimmi immikkoortortaqarfia nalunaarpoq.
Taanna 54-inik ukiulimmik Catherine Jenkinsimik 1985-imi marsimi toqutsisimanini pissutigalugu toqunneqarpoq. Toqutaasoq motelimi asaasutut sulisimavoq sisamanillu meeraqarluni.
Hines toqumut pillaaserneqarsimasup allap maajimi toqutaanissaralua maajimi unitsinneqarnera pissutigalugu, naalagaaffimmi USA-p kujataaniittumi toqumut pillakkatut toqutaasut siullersaaraat. Peqqissaasutut sulisut kapuummik taqqatigut kapisiniarlutik kapisiffissaminnik taamani nassaarnaveerput.
70-inik ukiulik Carlos Cuesta-Rodriguez naalagaaffimmi Oklahomami illoqarfimmi McAlesterimi parnaarussivimmi toqunartumik sisamanngornermi kapineqarpoq, naalagaaffiup inatsisinik atuutsitsinermut ministereqarfiata allaffia nalunaarpoq.
Taanna inooqatigisimasaminik, Olimpia Fisherimik, 2003-mi toqutsisimasutut eqqartuunneqarpoq.
42-nik ukiulik Jeremy Williams Alabamami pillakkatut toqunneqarpoq. Taanna niviarsiaqqamik tallimanik ukiulimmik Kamarie Hollandimik pinngitsaaliisimasutut toqutsisimasutullu 2021-mi eqqartuunneqarpoq.
Peqatigiiffik Death Penalty Information Centerip paasissutissiinera naapertorlugu, pillakkatut ullormi ataatsimi toqutaasut 2010-mili aatsaat taama amerlatigaat.
Pillakkat pingasut sisamanngornermi toqunneqarput, taamaalilluni USA-mi pillakkat katillugit 22-t ukioq manna toqunneqarput. Floridami aqqaneq-marluk, Texasimi sisamat, Oklahomami pingasut aamma Arizonami, Tennesseemi Alabamamilu tamarmik immikkut pillakkamik ataatsimik toqutsisoqarluni.
USA-mi naalagaaffiit 50-it akornanni naalagaaffinni 23-ni toqumut pillaasarneq atorunnaarsinneqarpoq, naalagaaffinnilu allani pingasuni - Californiami, Oregonimi Pennsylvaniamilu - toqumut pillaaneq atorunnaarsikkallarneqarluni.
USA-mi pillakkat 47-t ukioq kingulleq toqunneqarput. Pillakkat 52-it 2009-mi toqunneqarnerannit aatsaat taama amerlatigaat.
Præsident Donald Trumpip toqumut pillaasarnerup atugaanerunissaa kaammattuutigaa.
RITZAU/AFP