Nuna allanngutsaaliugalersussaq kinguaariinnut tulliuttunut piuartinneqassaaq

Kalaallit Nunaata kitaani Kangerlussuup aamma Qeqertarsuup Tunuata akornanni nunamik allanngutsaaliuligassamik nutaamik juunip aallaqqaataani atuutilersitsisoqassaaq.

Tamanna Naalakkersuisut tusagassiorfinnut nalunaarutaanni allassimavoq.

Nunamik ukiut 52-it matuma siorna allanngutsaaliukkamik pilersitsisoqarmalli, aatsaat pilersitsisoqaqqippoq.  

Avatangiisinut, Pinngortitamut, Nukissiuutinut Ilisimatusarnermullu Naalakkersuisoq, Jørgen Rosbach (D) naapertorlugu, nuna allanngutsaaliugaq Kalaallit Nunaata nammineerluni  allanngutsaaliugassanngortitarivaa.
Tamatuma innuttaasut sumiiffimmik atuiuarsinnaanerat qulakkiissavaa, najukkanilu ineriartornissamut piujuartitsiviusumillu takornariartitsinissamut periarfissanik nutaanik pilersitsissalluni.

- Kalaallit Nunaata kitaani nunamik allanngutsaaliugassamik pilersitsinikkut allanngutsaaliuineq, kitaata pinngortitaata immikkuullarissup illersorneqarnissaanut pingaarutilimmik alloriarpugut, tamanna maanna kinguaariit kinguliisalu iluaqutissaraat, taanna tusagassiorfinnut nalunaarummi oqarpoq.

Kommunit qilanaaruteqartut

Nuna allanngutsaaliugaq Kommune Qeqertalik aamma Qeqqata Kommunia qanimut suleqatigalugit pilersinneqarpoq, ukiunilu arlalinni piareersarneqarsimalluni.

Ukiut arlalit kingumut qiviaraanni, 2020-mi kommunit aamma peqatigiiffik Wild Nature Foundation nunap allanngutsaaliugassanngornissaanik kissaateqaqqaarput. Ilisimatusartut, innuttaasut, piniartut suliallillu allat ilisimasaminnik, paasisimasaminnik, nunamik allanngutsaaliugassamik suliniuteqarnertik tamatuma kingorna aallartippaat.

Tamatuma saniatigut kommunini innuttaasunik ataatsimiititsisoqartarpoq, piffissamilu 2025-mi decembarimiit 2026-mi martsimut nuna allanngutsaaliugassaq tamanut tusarniaatigineqarsimalluni.

- Innuttaasut ilisimasaasa tusaaniarneqarnissaat kisiat pinnagu, kisiannili aamma inaarutaasumik inerneranut piviusumik sunniuteqarsimanissaata qulakkeernissaa, uatsinnut pingaaruteqarluinnarsimavoq. Taamaalilluta nuna allanngutsaaliugaq ileqqutoqqat tunngavigalugit isumatusaartumik siunissami atorneqartarnissaa qulakkiissavarput, Kommune Qeqertalimmi borgmesteri Simigaq Heilmann (D) oqarpoq. 

Tamatuma saniatigut nuna allanngutsaaliugaq pinngortitap immikkuullarissup illersorneqarnissaanut tapertaasussaq pingaaruteqartoq, Qeqqata Kommuniani borgmesteri, Malik Berthelsen (S) oqarpoq.

- Nuna allanngutsaaliugaq sermersuup iigartarfiinit sinerissamut annertussuseqarpoq, uumassusilinnillu assigiinngisitaartorujussuarnik peqarpoq, uumasut naasullu qaqutigoortut nungoratarsinnaasut ilaatigut ilaallutik, tusagassiorfinnut nalunaarummi nangilluni allassimavoq.

Periarfissarpassuaqarpoq

Nuna allanngutsaaliugaq sermersuup iigartarfiinit sinerissamut annertussuseqarpoq, uumassusilinnillu assigiinngisitaartorujussuarnik peqarpoq, uumasut naasullu qaqutigoortut nungoratarsinnaasut ilaatigut ilaallutik, tusagassiorfinnut nalunaarummi nangilluni allassimavoq.

Innuttaasut sumiiffimmi angalasinnaanerat, piniarsinnaanerat, aalisarsinnaanerat nuniassinnaanerallu allannguuteqaratik ingerlaannassapput.

Taamaattorli uumassusillit sunnertiasut illersorniarlugit, sumiiffiit immikkoortuini killilikkani piffissani aalajangersimasuni killilersuigallartoqartassaaq. Ilaatigut puisinik qasigissanik, nunap nerlerinik, qeerlutuunik imarmiunik isasunik, kiisalu tuttut piaqqiornerisa nalaanni killisersuisoqartassaaq.

Nuna allanngutsaaliugaq suli kalaallisut ateqanngilaq. Innuttaasulli qanittukkut atsiinissamut sunniuteqarsinnaalissapput, tassami ateqarnissaanut unammisitsineq qanittukkut aallartinneqassammat.

Nunarsuarmi nuna allanngutsaaliugaq annertunerpaaq Kalaallit Nunaanniippoq .Tunup Avannaarsuani nuna allanngutsaaliugaq, 972.000 kvadratkilometerinik annertussuseqarluni, sumiiffiullu ilarujussua sermersuarmik qalleqqavoq.