Ippernamit kiitinneq ungilaannarani pullaannaranilu navianarnerusinnaavoq. Canadap illoqarfiisa ilaanni Torontop uumasuusivissuani ippernaq nannussimasoq Canadami aviisi Canadian Press allaaserisaqarpoq.
Nannup angutivissap, Kunimmik taagorneqartup, niui qaammat kingulleq nukillaarsimapput. Tamannalu pillugu nanoq 26-inik ukiulik uumasut nakorsaannit toqunneqartariaqarsimavoq.
Kuniup timaa maanna misissorneqareermat paasinarsivoq, virusimik immikkut ittumik, West-Nile virusimik, nanoq tunillanneqarsimasoq. Ippernaq kiisigaangami virusimik taassuminnga tunillaasarpoq.
Virusi taanna aatsaat nannumi naammattoorneqarpoq.
Qitsuit, qimmit inuillu virusimik taassuminnga siornatigut tunillanneqartartut ilisimaneqarpoq. Virusi katsorsarneqarsinnaanngilaq akiuussutissaqaranilu.