Per Berthelsen: Doris-i AWG-liartariaqanngikkaluarpoq

Kultureqarnermut naalakkersuisup Doris Jakobsenip Alaskami Inuit Issittormiut Unammiuaaqatigiinnerannut atatillugu angalasimanera pissutaalluni, aningaasaqarnermut inatsisissap suliarineqarnissaralua kinguarpoq. Taamatullu pisoqarsimasariaqanngikkaluartoq Inatsisartut siulittaasoqarfiani ilaasortaasoq Per Berthelsen oqarpoq.

Naalakkersuisut angalasarnerat inatsisartut siulersuisoqatigiivisa februaarip qaammataani eqqartorpaat.

Kultureqarnermullu naalakkersuisup Doris Jakobsenip Alaskamut angalanera itigartitsissutaasimasariaqaraluartoq Per Berthelsenip oqaatigaa.

- Siulittaasoqarfimmi naalakkersuisut aningaasanut inatsisissaat oqaluuserineqartillugu angalasarnerat ajornanngippat pakkersimaarneqarluinnarnissaanik kaammattuuteqarpunga.

- Sooruna taamatut oqaaseqarsimasutit?

- Tassa nunarput ingerlasinnaanngimmat aningaasanut inatsiseqarani aammalu nalinginnaasuummat aningaasanik inatsisissap oqallissutigineqarnerani naalakkersuisut aggersarneqartartut aningaaqarnermut ataatsimiititaliamut taakkulu suliap ingerlanissaanut pingaaruteqarluinnartuusut nalunnginnakkit, Per Berthelsen oqarpoq.

- Pisuni aalajangersimasuni soorlu Issittumi nunallit unammiuaaqatigiinnerisut ittuni Naalakkersuisut peqataanissaat pingaaruteqannginnami?

- Pingaaruteqarsinnaavoq, naalakkersuisoq pineqartoq annertuumik pisassaqarluni taavaniittussaasimappat. Kisianni nalunngilarput aamma radioavisikkut tusarpara oqaatigigaa, akunneq ataaseq ministereqatini ataatsimeeqatigisimagai. Taava uani apeqquserpara ilumut nunatsinni aningaasanut inatsisissaq kinguartinneqarsinnaanersoq suliassaq taamak annikippalutsigisoq tunngavigalugu, Per Berthelsen oqarpoq.

Inatsisartunut siulittaasoq Jonathan Motzfeldt radioavisimut oqarpoq, issittormiut unammiuaarnerini Kultureqarnermut naalakkersuisup peqataasarnera ileqquusoq.

Doris Jakobsenillu angalanissaa akuersissutigineqarmat Inatsisartuni siulersuisoqatigiit ilisimasinnaanngikkaat kultureqarnermut naalakkersuisup pisariaqartinneqarumaarnera.