Alaskami uuliaarluerneq

Alaska uuliaarluernermik misigisaqaqqippoq. Alaskap avannarpasissortaani uuliamut ruujori putummat uulia 1 millioni literip tungaanut aniavoq. Uuliaarluernermik aatsaat taama annertutigisumik tassani pisoqartoq, Alaskami avatangiisinut ministeriaqarfik nalunaaruteqarpoq.

Uuliaarluerneq USA-p uuliasiorfiani Prudhoe Bay-imi pisoq, marsip aappaani paasineqarpoq. Nalunaarusiaq kingulleq malillugu atuarneqarsinnaavoq uulia 1 millioni literip tungaanut ruujorimit aniasimasoq, hektarilu ataatilaarlugu annertutigisumut aniasimasoq. Uuliaarluerneq ruujorip manngertornineranik peqquteqarsorineqarpoq.

Uuliaarluerfiusumi isserujussuarnerata uuliamik qalluiniarneq ajornakusoortippaa.

Alaskami uuliaarluerneq kingulleq marsimi 1989-mi pivoq, umiarsuarsuaq uuliamik assartuut Exxon Valdez Prins William Sundimi, Anchoragep kujasissortaani ikkarlimmat. Umiarsuaq uuliamik 200 millioni literimik useqarsimavoq, taakkunanngalu uulia 41,8 millioni literit ikermut aniavoq. Uuliasiorfissuaq Exxon Mobil Corp. 2004-mi 6,7 milliardi dollarsinik (tassa koruuninngorlugu 42 milliarder koruuninik) uuliaarluernini akiliisitaassutigaa.