Irakimi saassussinerit sakkortusiartorput

Irakimi danskit sakkutuut pikititsinianik saassunneqartarnerat sakkortusiartorpoq akulikilliartorlunilu. Pikititsisut sakkutuut Irakimit aninissaannik kissaateqartuupput.

Sapaatip-akunnerini kingullerni sakkutuut danskit saassunneqaqattaareerlutik ippassaq illoqarfimmi Al Hartha-mi eqqissiviilliorfioqisumi nakkutilliitillutik marloriarlutik rakettinik aallaasinillu sakkulersortunit saassunneqarput. Inunnik atortunillu ajoqusertoqanngilaq danskillu saassunneqarnitik tamaasa akisarpaat. Irakimiunilli ajoqusertoqarsimanersoq toqutaasoqarsimanersorluunniit nalunaartoqanngitsoq, Sakkutuut pisortaqarfianit HOK-mit nalunaarutigineqarpoq.

Illoqarfik Al Hartha Irakip kujasissortaani illoqarfissuup Basrap eqqaaniittoq, danskit sakkutuuisa nakkutigisassaannut akeqqersimaarfiunerpaallunilu suliffigiuminaannerpaavoq. Tassani aamma sakkutooq Bjarne Kirkmand siorna oktoberimi aqqusinermi qaartartumeerisoqarnerata kingunerisaanik toqutaavoq.