KANUKOKA qorsummik pisiniartarpoq

KANUKOKA qorsummik pisiniartarpoq. Taama qulequtserlugu Kalaallit Nunaanni Kommuneqarfiit Kattuffiat tusagassiutinut nalunaaruteqarluni allagaqarpoq.

- Qorsummik pisiniartarnissamik polikkimut peqataavugut nunatsinni atuisartunut ajunngitsorsiassanik sunik tamanik atuinerujartuinnarnerput pissutigalugu, tamatumami kingunerisarmagu eqqagassat avatangiisinullu pitsaanngitsut sumi tamani amerliartuinnarnerat, siulittaasoq Lars Karl Jensen allappoq.

Inuiaqatigiit piniartukkormiuusimariarlutik, piffissap sivisunngitsup ingerlanerani inuiaqatigiinngorsimapput nutaaliaasut, atuisutut ajunngitsorsiassanik, suliffissuarni nioqqutissianik atuinermigut avatangiisinut navianartunik eqqagassiortorujussuit, taamaattumik innuttaasut ataasiakkaarlutik peqataanerat pissusilersuutaallu siunissami pingaaruteqartut, KANUKOKA allappoq.

Nioqqutissiat avatangiisinut ajoqusiisarneri ilisimagutsigit sumiiffinni mingutserisuussut, tassa nunaannarmi eqqaavissuit, eqqakkanik ikuallaasarneq, imikumik maangaannaq kuutsitsisarneq il.il. killilersimaarniarsinnaavagut.

KANUKOKA-p suliniut siornali Danmarkimi avatangiisinut aqutsisoqarfik Miljøstyrelsen suleqatigalugu, aallartippaa.