Aqqalu Jerimiassenip ikiaroornartoq hashi akuerisaassanersoq Facebookimut quppernerminut oqallissaarutigaa.Foto: KNR

Aqqalu Jerimiassenip hash akuerisaassanersoq oqallikkusuttoq

Inatsisaatsuliornikkut hashimik tuniniaanikkut aningaasarpassuit kaasarfimmiorsiarineqartartut Aqqalu Jerimiassen allappoq, taamaammallu aanngajaarniutit akuerisaanissaannik apeqqusiilluni oqallissaarivoq.

Ikiaroornartoq hashi inerteqqutaajunnaassava?

Atassutip siulittaasuata Aqqalu Jerimiassenip Facebookimut quppernerminut apeqqut saqqummiuppaa.

Ikiaroornartumut hashimut qanorluunniit inatsit qanorluunniit sukateriffigitigigaluaraanni, eqqussiniartuartoqartuaannassasoq, taanna isumaqarpoq, taamaammallu akuerisanngortinneqassanersoq oqallissaarutigaa.

Toqqorlutik eqqussuinermi "naalagaasut" akiorniarlugit piuneerunniarlugillu pisortat aqutamik ammaassippata iluaqutaassanersoq, taassuma apeqqutigaa.

Nunatsinni hashimik arsaarinnissuteqartarneq ukiuni kingullerni  annertusiartorpoq, malitsigisaanillu inuit ikiaroornartumik nunatsinnut eqqusseriaraluartut tigusarineqartartut amerliartorlutik.

LÆS OGSÅ Flere smuglere anholdt: Hash er synderen

Hashimik siornaak 97,4 kilomik arsaarinnittoqarpoq. Taanna ukiuni kingullerni tallimanik agguaqatigiisillugu arsaarinnissutigisartumik annertunerungaatsiarpoq. Ukiummi kingulliit tallimat agguaqatigiisillugu 64 kilo hashi arsaarinnissutigineqartarpoq.

Tamanna politiit 2021-mi ukiumut nalunaarusiaanni erserpoq.

Aqqalu Jerimiassenip tamanna maanna qisuariarfigaa.

Ilaqutariinnut akornutaasoq

Atassutip siulittaasuata nammineerluni inuusuttuunermi nalaani atuisuusimanini saqqummiussamini nassuerutigaa.

Ikiaroornartumilli atuiunnaarnerminiit ukiut aqqaneq marluk qaangiunnikuusut taassuma erseqqissaatigaa.

Ikiaroornartoq hashi ilaqutariippassuarnut ajoqutaasartoq, ikiaroornartumillu atornerluisartut avatangiisiminnut sunniuteqarnerluttartoq, taanna isumaqarpoq.

 

 

Ikiaroornartorli akuerisaagaluarpat Aqqalu Jerimiassenip iluaqutaasinnaasoraa.

“Aqutamik ammaassinermi atornerluisuusutut takuneqarsinnaasut maluginiarneqarnerulernerisigut katsorsagassaasut ikiorneqarsinnaanerulissagaluarnerpat?”

Inatsisaatsuliorluni aningaasannattaat

Nunatsinni unioqqutitsilluni ikiaroornartumik hashimik qanoq annertutigisumik tuniniaasoqartarnersoq misissorneqartariaqartoq, Aqqalu Jerimiassen isumaqarpoq.

“Ila qasserpassuimmita aningaasat nalunaarsornertaqanngitsumik nunatsinniit tammaannartarpat?”, taanna allappoq.

LÆS OGSÅ Hash til en værdi på op imod 12 millioner kroner konfiskeret på RAL-skib

Inatsisaatsuliornikkut aningaasannattaat ilaqutariinnut qanoq ajoqutaatigisarnerat aamma qanoq akiorneqarsinnaanersoq taassuma apeqqutigaa.

Facebookiminut quppernerminut saqqummiussamini kingullertut apeqqutigaa “illit qanoq isumaqarpoq?”. Tassungalu oqaaseqartut aqqaneq marluupput.

Oqallinnerli nittartakkakkut inuit attaveqaqatigiittarfiisigut kisimik oqallissaarutigineqassanngitsut, partiip siulittaasuaq isumaqarpoq.

- Uniaakkami oqimaalutagassarput, qanoq oqallinniarpugut? Ammaanneqarnissaanut oqallinniarpugut? Imaluunniit inatsisinut suli sukaterinissamut oqallinniarpugut? Peqqinnissaqarfiuppat, innuttaasut tungaanniiupaat, naalakkersuisuninngaaneerpat tamaasa tusarnaarneqartariaqarput oqallinnermi, Aqqalu Jerimiassen KNR-imut oqarpoq.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl