Svenskit ministeriunerat: NATO-mut ilaasortanngornissarput allaninngarnit pingaarneruvoq

Sverigep Finlandillu NATO-mut piaartumik ilaasortanngornissaata pingaaruteqateqassusia, svenskit ministeriunerata Ulf Kristerssonip ippassaq marlunngornermi unnukkut erseqqissaatigaa.

- Finlandilu NATO-mut piaartumik ilaasortanngornissarput pingaaruteqarneruvoq nunat tamat isumannaallisaanernut apeqqusiinerat pineqartillugu.

- Ilungersunarnera svenskinut tamanut paaseqquara, ilungersunartorujussuuvoq. Sorsunnersuarmi kingullermi pisuniilli aatsaat taama ajortigisumik aqqusaagaqarpugut. Ulf Kristersson svenskit naalagaaffiata tusagassiorfiani SVT-mi taama issuarneqarpoq.

AAMMA ATUARUK Paludanip koraanimik ikuallatsitsinera USA-p uumitsaatigigaa

Sverige Finlandilu illersoqtigiinnut NATO-mut ilaasortanngorniarlutik siornali qinnuteqarput.

Svenskit illersoqatigiinnut NATO-mut ilaasortanngornissaannut Tyrkia kisiartaalluni isumaqataanngilaq. Tamatumunnga pissutaavoq danskisut svenskisullu innuttaassillip, Rasmus Paludanip, muslimit illernartuutitut atuagaat koraani tyrkiamiut Sverigemi aallartitaqarfiata silataani ikuallammagu.

Sverigip NATO-mut ilaasortanngornissaanut Tyrkia tamatuma kingorna tapersersuinavinanngitsoq, Tyrkiap præsidentia Erdogan oqarpoq.