Maya-Natuk nunarsuarmi siuttunut: Silap pissusianik ajornartoornerput meeqqatsinnut ingerlateqqikkusunngilarput

15-inik ukiulik Maya-Natuk Rohmann Fleisher qungussutaaraluarluni pissanganerup pianik aqajannguummertaarpoq.

Taanna silap pissusiata allanngoriartorneranik ilungersuuteqartuuvoq, silallu pissusiata allanngoriartornerata nunatta inuinut qanoq sunniuteqartigineranut tunngasumik Naalagaaffiit Peqatigiit COP27-mik taallugu silap pissusia pillugu ataatsimeersuartitsineranni ullumi pingasunngornermi minutsini marlunni oqalugiarpoq.

COP27-milu oqalugiarnissaminut annilaangalaarluni, Maya-Natuk Rohmann Fleisher oqarpoq. Taanna ilinniarnerminut atatillugu maanna Frankrigimiikkallarpoq.

- Periarfissatsialarujussuuvoq – aamma pissanganaqaaq, Maya-Natuk Rohmann Fleisher oqarpoq.

AAMMA ATUARUK Kitsissuarsummiu Lars Peter Mølgaard COP27-mi oqalugiartoq

Taanna Naalagaaffiit Peqatigiit meeqqat pillugit siunnersuisoqatigiivi sinnerlugit COP27-mi ataatsimeersuaqataavoq.

Meeqqammi ingammik kalaallit meerartaasa silap pissusiata allanngoriartorneranut tunngasuni isumaasa tusaaneqarnerunissaat pisariaqarpoq.

- Silap pissusiata allanngoriartornera nunatsinnut qanoq sunniuteqartiginersoq oqaluttuarerusullugulu nunat tamatumani tusaaneqarpiartarsimanngitsut tusaaneqarnerunissaat qanoq pingaartigisoq aamma erseqqissaatigerusuppara, Maya-Natuk Rohmann Fleisher oqarpoq.

Inuusuit silap pissusiata allanngoriartorneranik ilungersuuteqarrattut

Illoqarfimmiu Maya-Natuk Rohmann Fleisher asiarpiartarsimanngilaq.
Tamannali UNICEF Danmarkip Naalakkersuisullu suleqatigiillutik pilersitaanni, tassa meeqqat isummersorfianni Nakuusami, ukiut marluk matuma siorna ilaasortanngormat allanngorpoq, taassumami silap pissusiata allanngoriartornerata sunniutai arajutsisimajunnaarpai.

Siornatigummi qaqqippiartarsimanngilaq, silalli allanngoriartorneranik ilungersuuteqartunngorami asiakulalerpoq.

- Asiakulalernikuuvunga, aamma pinngortitaq eriaginerulerlugulu eqqakkanik naammattuuigaangama taakkuninnga katersisarpunga. Eqqagassanik siornatigornit immikkoortitsinerujussuanngornikuuvunga. Tamakku tamarmik uannut sunniuteqarnikooqaat, Maya Natuk Rohmann Fleisher oqarpoq.

Silallu pissusiata allanngoriartornera ingammik nunatta meerartaannut qanoq sunniuteqartiginersoq suaarutiginiarlugu silap pissusiata allanngoriartorneranik maanna ilungersuuteqartuuvoq.

Taassuma ingammik meeqqani silap pissusiata allanngoriartorneranit eqqugaanerpaasut, soorlu qeriuaannartup aakkiartornerani angerlarsimaffeerussimasut imaluunniit piniartut aalisartullu qitornaat eqqarsaatiginerusarpai.

Ingammik sermersuaq aakkiartortoq eqqaagaangamiuk siooraammerujussuartarpoq.

- Aammali silap pissusiata allanngoriartornerata pimoorussinerulersippaanga, allannguisariaqarpugummi. Silap pissusia allanngoriartupiloortoq nalunngilarput, uagullu siulitta eqqarsaatigisariaqarsimanngisaannik iliuuseqartariaqarpugut. Taamaammat uannut sunniivoq, taanna oqarpoq.

Inersimasut sussakkeernikuugaat

Silap pissusiata allanngoriartorneranik siooqqateqarneq Maya-Natuk Rohmann Fleisherip ulluinnarsiutigilernikuugaluarlugu inuusoqatiminik immisulli ilungersuutilinnik nunarsuarmioqateqarnini arajutsisimanngilaa.

Silallu kissatsikkiartuinnarneranik sermersuullu aakkiartorneranik siooqqateqaraluarluni tamanna inuttaanut neriuuteqalersitsiuaannarpoq.

- Meeraasugut neriuutaarukkaluarutta kikkut allat neriuuteqartuussagaluaramik? Inersimasut sussakkeerinnissimasut amerlapput. Tamanna oqallisigisaqaarput. Ilungersunaqaarlu, uagummi meeqqat tusaaqquniarpiloortaqaagut, taanna oqarpoq.

Taassumalu meeqqat politikkikkut aalajangiiniarnerni peqataatinneqartalernissaat nunat siuttuisa ataatsimeersuarneranni ullumi pingasunngornermi minutsini marlunni oqalugiarami kajumissaarutigaa.

- Uagut kinguaariit tulliusugut silap pissusiata allanngoriartorneranut tunngasuni akisussaasuusussaavugut. Uagullu silap pissusiani ajornartoornitsinnik meeqqatsinnut ingerlatitseqqeerusunngilagut, taanna oqarpoq.