Nukissiorfiit: Nuuk innaallagiaqaqqilerpoq
Nuummiut illoqarfiit pingaarnersaanni qamittooqqallutik ullaaq iternerata kingorna maanna angerlarsimaffinni tamani imeqaleqqillunilu kiassarneqaqqilerpoq.
Nukissiorfiit KNR-imut paasissutissiipput.
Innaallagiaarunneq innaallagissiorfimmi 400-p aqqutaani Sarfannguani atortorissaarutinik attuuttoortoqarneratigut pisoq, Nukissiorfiit immikkoortortami pisortaat, Filip Sivertsen oqarpoq.
Tamannalu annikitsumik ikuallannermik kinguneqarpoq.
- Innaallagissamik sakkortuumik sakkukillisitsivimmi attuuttoornikkut sarfaaruttoqarpoq. Tamanna imermik nukissiorfiup atassuteqarnerata katanneranik kinguneqarpoq, immikkoortortami pisortaq oqarpoq.
Nalaatsornikkut pisut
Nukissiorfiit Nuummi Radiop qaqqaani illuutaanni ippassaani aamma ikuallattoqarpoq.
Immikkoortortamili pisortap ikuallannerit taakku marluk akornanni atassuteqannginnerarpaa.
- Taakku marluk immikkoorluinnarput, Filip Sivertsen oqarpoq.
Ukiuni kingullerni arlaleriarluni qamittoortoqarpoq. Tamanna Nukissiorfiit aningaasatigut kinguleruttoornerujussuannik pissuteqarpa?
- Tamanna toqqaannartumik oqaatigineqarsinnaanngilaq. Atortorissaarutaatigut Danmarkimi allanilu aserfallatsaaliuinermut pilersaarutit assigalugit aserfallatsaaliorneqartarput. Taamaammat uku pisut aningaasatigullu kinguleruttoornerup akornanni toqqaannartumik atassuteqanngillat, Filip Sivertsen oqarpoq.
Arlaleriarlunimi innaallagiaaruttoortoqarnera sumik pissuteqarpa?
- Ilaannikkut nalaatsornikkut pisoqarnera pissutaasarpoq. Imaassinnaavoq ukiut arlallit matuma siorna kukkuniminnguaq arriitsumik ineriartorsimasoq tassanngaannartumillu takuneqarsinnaanngitsumik kabelit atassuteqarfianni ajutooriasaartoq, Filip Sivertsen oqarpoq, nangillunilu:
- 2005-imi aamma anorersuarujussuarnera pissutigalugu qamittooqattaangaatsiarput. Taamaammat nalaatsornikkut pinerukannerput. Ajutoornerit assingi pinaveersaarlugit soorunami ilisimasaqalerniarsarivugut.
Sermitsiaq.AG naapertorlugu politiit innaallagissiorfimmi Sarfannguani ikuallattoqarneranik nal. 01.32 nalunaarfigineqarnerata kingorna Nuup 80 procentiani innaallagiaqanngilaq.
