Angerlarsimaffeqanngitsut kisinneqalersut: Politikerit soqutiginerulissavaatigut
Sapaammi ualikkut KNR-miit angerlarsimaffeqanngitsunut oqquisarfik Kialaarfik iserparput, ullullu tamarluinnaasa angerlarsimaffeqanngitsut Kialaarfimmut oqquiffissarsisarput.
Jakobine Reynisson, Kialaarfimmi sulisuuvoq, taassumalu isertut kaffillerfigalugillu innarfissaannik isumagisarpai.
Kialaarfimmi innarfissat 40-sut amerlanertigut ullut tamaasa ulikkaartarput, utaqqisoqartaqisorlu Jakobine Reynisson oqaluttuarpoq.
Ilisimatusartut Ilisimatusarfimmilu ilinniartut Nuummi qassinik angerlarsimaffeqanngitsoqarnersoq paasiniarlugu apriilimi unnuakkut ataasiaannaratik kisitsipput.
Nunatsinnilu angerlarsimaffeqanngitsut qassiunersut paasiniarlugu illoqarfinni anginerni angerlarsimaffeqanngitsut oqquisarfiinut aamma pulaarput.
Nunatsinni angerlarsimaffeqanngitsunik kisitsineq pillugu nalunaarusiaq aasaru piareeriarpat saqqummissaaq.
Tusarfik: Sermitsiaq.AG.
Illoqarfiit pingaarnersaanni angerlarsimaffeqanngitsut qasserpiaanerat ilisimatusartoqatigiit sisamanik inuttallit kisittussanngorpaat, taakkunannga pingasut ilinniartuusut Nuummi qassinik angerlarsimaffeqanngitsoqarnersoq kisittussanngorpaat.
Sermitsiaq.AG. aammalu Arctic Hub taama allapput.
Tamanna Naalakkersuisunit suliakkiissutigineqarpoq, siunertarineqarluni nunatsinni angerlarsimaffeqanngitsut qasserpiaanerisa tamakkiisumik ilisimaarineqalernissaat.
Jakobine Reynisson kisitsinissamut isumalluarpoq.
- Ullumikkut siniffiit ulikkaaqqapput, maaniinniartoqarunilu kommunamiit allagartamik peqqaartariaqarpoq, Jakobine Reynisson oqarpoq.
Politikerit angerlarsimaffeqanngitsunut ilisisakipput
Jakobine Reynissonip mianersorluni matut kasuttorpai.
Karl Åge Lyberthilu anillappoq, taannalu Kialaarfimmi atuisuuvoq.
Karl Åge Lyberth. Assi: KNR
Taassuma angerlarsimaffeqanngitsut kisinneqartussanngornerat nuannaarutigaa, ullummi tamaasa misigisarpaa angerlarsimaffeqanngitsut amerliartuinnarnerat aammalu inuusussiartuinnarnerat.
- Politikerit tamakkiisumik ilisimanngilaat angerlarsimaffeqanngitsut qasserpiaanerat, aammalu qanoq aaqqiivigineqarsinnaanerat, ajornartorsiummut politikerit eqqumanngillat, oqarpoq nangipporlu:
- Kommunemi politikerit aamma taamaapput. pilersaarusiorneq ajorput, angerlarsimaffeqanngitsunik qanoq ikiusoqarsinnaaneranik, oqarpoq.
Oqquisarfik alla Nuummi umiarsuialiviup tungaani inissisimavoq tassaniipporlu Karl Kristoffersen kaffisorusaarlunilu, taanna KNR-ip tusagassiortuinut iggavimmut isertunut inussiarnisaarpoq.
Karl Kristoffersenip eqqaamaqqissaanngilaa qanoq sivisutigisumik angerlarsimaffeqanngitsutut inuunerluni, ukiut marluk tallimalluunniit missaaniikkunarput taanna oqarpoq. Taassuma neriuutigaa, angerlarsimaffeqanngitsunik kisitsisoqartussanngornera imminerminnut iluaqusiiumaartoq.
- Qanoq misigisarnersugut immaqa apersuutigineqalissaaq, qanorlu ikiorneqarsinnaanersugut. Atukkagummi ilaanni sakkortusaqaat, assersuutigalugu maanngaanniit ullaakkut qulingiluanut anisussaatitaavugut, tamannalu ilaanni artornartaqaaq isersimaannarusunnartaraluaqigamimi ingammik silapilutsillugu, maanili Herbergimi malittarisassat malillugit taamaalioqqusaanngilagut, Karl Kristoffersen oqarpoq.
Siunissami kisitsinerit arlaqarnerusut
Angerlarsimaffeqanngitsunik kisitsinermiit inernerit aggustimi tunniunneqassapput, pilersaarutaavorlu siunissami kisitsinerit taama ittut pisalerumaartut.
Steven Arnfjord Ilisimatusarfimmi Inuiaqatigiilerinermik aningaasaqarnermik tusagassiornermillu immikkoortortami lektoriusoq misissuinermi aqutsisuusussaq Sermitsiaq AG-mi apersorneqarnermini ima oqarpoq:
- Kisitsineq siulleq inuit angerlarsimaffeqanngitsut qanoq amerlatiginerannik tullianilu qanoq iliornissamut takussutissiissaaq. Inuit qanoq amerlatigisut pineqarnerinik eqqornerusumik paasisaqarniarutta, piffissami sivisunerusumi arlaleriarluta kisitseqqaarnissamik pisariaqartitsivoq, Steven Arnfjord oqarpoq.
Piffissaq killigititaasussaq sioqqullugu Steven Arnfjord oqaaseqartinngitsoorparput.
