-Thue Christiansenip Erfalasutsinnik tunniussaqarnini qaqugorsuarmut eqqaamaneqaatigissavaa. Naalakkersuisuni siulittaasuusimasoq taama oqarpoq.Foto: Emil Helms/Ritzau Scanpix

Erfalasutta ataataa toqukkut qimaguppoq

Nunatta Erfalasuanik pilersitsisoq Thue Christiansen 82-inik ukioqarluni toqukkut qimaguppoq.

Nunatta Erfalasuanik pilersitsisoq Thue Christiansen sivisuumik napparsimareerluni 82-inik ukioqarluni toqukkut qimaguppoq.

" Kingullertigut KNR-ip inuiattut ullorsiornermit tusarnaagassiaanik tusarnaarnissani erinigisimavaa, nunatsinnilu tamanut asannittumik inuulluaqqusilluni. Oqaasisa kingulliit ilaat Erfalasutsinnut tunngapput. Erfalasorput nunatsinni nuannaarutaallunilu inuiaqatigiinnik katersuutsitsiumaartoq neriuutigalugu oqarpoq." Thue Christiansenip ilaqutai, tusagassiuutinut nalunaarumiinni taama allapput.

Thue Christiansen piffissami sivitsortumi uummallulluni napparsimareerluni Danmarkimi illoqarfigisamini Hals-imi ullaaq toqukkut qimaguppoq.

Ilinniartitsisoq naalakkersuisunullu ilaasortaq

Namminersornerulerneq nunatsinnut 1979-imi eqqunneqarmat, Thue Christiansen, taamani ilinniartitsisuusoq Siumut sinnerlugu nunatsinni siullersaalluni kultureqarnermut ilinniartitaanermullu 1983-ip tungaanut naalakkersuisuusimavoq.

Thue Christiansenip nunatsinni ataqqineqaatigalugu ilisimaneqaatigaattaaq Erfalasutsinnik pilersitsisuunini. 

Thue Christiansen toqukkut qimaguttoq pillugu ukiorpassuarni ikinngutaa suleqatigisimasaalu politikeri nunatsinni naalakkersuisunut siulittaasuusimasoq Lars Emil Johansen attavigaarput taannalu  Thue Christiansen eqaaniarlugu ima oqarpoq: 

-Tassa ullaaralaarsuaq, ullaaq arfineq qaangilaartoq ernerata Lars Thue Christiansenip kalerrippaanga Thue toqusoq. Aamma tamanna tupaallaatigerujussuanngilara napparsimaqisoq nalunnginnakku aamma oqaluuttarakku ulluni kingullerni. Soorlu inuiattut ullorsiornissatsinnut aqaguttoq oqaluuppara, qinnuigaanga inuiannut inuulluaqqussutini apuuteqqullugu, oqarlunilu oqaqqullunga: "Asavassi tamassi". Tassa Thue inuk taamaattuuvoq. Ilinniartitsisuuvoq eqqumiitsuliortuullunilu taavalu kalaallisut inuunermik pingaartitsisuuvoq nunaqarfimmi inunngortuugami, illoqarfimmi alliartortuugaluarluni. Tamakkiisumik kalaaliussuseq pingaartitaraa aammalu suliaminut annertuumik pingaartitsisuulluni. Ikinngutigalugu aamma nuannersuuvoq, qiimasuuvoq illarumatuujullunilu.

Erfalasutta ilusilersorneqaqqaarnera

Lars Emil Johansenip Thue Christiansen nunatsinni naalakkersuisuni siullerpaani suleqatigisimavaa:

- Naalakkersuisuni siullerni ilaasortaaqatigiikkatta tallimaannaallutalu ataatsimooqatigiittorujussuuvugut, sutigut tamatigut peqatigiippugut. Taava Namminersornerup tungaanut alloriarneq siulleq, suliarigatsigu taamani inuiattut ullorsiortarnissarput, taavalu inuiattut erfalasoqarnissarput, taakkua killiffigigatsigit, Thue tassani annertuumik sunniuteqarpoq. Erfalasussatsinnik kalaallinut tunniussivoq. Inuiattut ilisarnaatitsinnik pilersitsisuuvoq.

Thue Christiansenip erfalasussatsinnik sanaqqaarnera Lars Emil Johansenip ima eqqaamasaqarfigaa:

- Tassa Thue taamanikkut uagutsinut pulaartoq. Taamanikkut aperivaanga aappaluttumik qaqortumillu qeratasuunik pappialaateqarnersunga, qiuutinillu. Taava eqqumiigingaluarlugu ernerput taamani meeraagami, taassuma atortui tigullugit tunniuppakka, sunaaffa erfalasussarput isumassarsiarigaa. Qiortarpaa liimmerlugulu, tassani taamaattumik oqarsinnaavunga erfalasussatsinnik sulinerata aallaqqaaterpiaa, taanna uanga nammineq isiginnaarsimavara peqatigalugulu.

Ilinniartitaanermut naalakkersuisoq siullerpaaq

Thue Christiansen inuttut suliaasalu nunatsinnut isumaat pillugu Lars Emil Johansen ima oqarpoq:

- Ilinniartitaanermut naalakkersuisoq siullerpaaq. Taanna sioqqullugu kalaallinit oqartussaaffigineqarsimanngitsoq, naalakkersuinikkut Thuep aamma akisussaaffigaa. Tassanilu pingaartittorujussuuai inuiaqatigiit kalaallit meerartaat aamma inuiaqatigiit kalaallit atugaannut tunngasunik ilinniartinneqassasut. Taamaattumik aamma oqarsinnaavunga eqqumiitsuliortutut politikeritullu piginnaanini ataatsimoortillugit erfalasuliorami atorpai.

Thue Christiansenip qimatarai nulii, qitornatik pingasut, ernuttatik qulit ernutaqqiutitsillu marluk. Thue Christiansen Danmarkimi Hou-ip oqaluffiani juunip 29-anni eqqaaniarneqassaaq, tamatumalu kingorna nunatsinni ilisaassasoq ilaqutai nalunaarput.

Erfalasutta ilutsimigut qalipaatimigullu ersersippai seqineq, kangerlussuit iigartartullit, iluliarsuit, sikut imarlu. Erfalasorput siullerpaamik amuneqarpoq 1985-imi inuiattut ullorsiornitsinni.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl