Danmarkip EM-imi unamminera annilaarnartoq
Danmark isikkammik arsaannermi Europami pissartanngorniuunnermi siullermeertumik ullumi unammivoq.
Unammineq annilaarnartunngoriasaarpoq, tassami danskit nunanut allanut unammisartuini pitsaanerpaat ilaat, Christian Eriksen, Finlandimut unamminerup immikkoortuata siulliup naammassilivinnerani ilisimajunnaarpoq, uniinnarlunilu arsaaffimmi nalalerluni.
Iliminiilli nakorsanillu sukkasuumik unguneqarpoq, akiutinullu ilineqannginnermini uummatimigut tagiartorneqarpoq.
Chrstian Eriksenip ilii, Finlandimiullu tupassimaqaat.
Peqqissusaa ajunnginnerulertoq
Taanna ambulancenut ilaalluni qimagutsinneqarpoq. Europami arsaattartut kattuffiat (UEFA) naapertorlugu Chrstian Eriksenip peqqissusaa maanna aalaakkaalluni patajaappoq.
Unammineq nalunaaquttap akunnera ataaseq unitsikkallarneqareertoq, Danmarkimi arsaattartut kattuffiat (DBU) nalunaarpoq, arsaanneq nanginneqassasoq.
- Arsaattartut Christian pillugu unammipput. Arsarput pissutigalugu Christian ajunngimmat. Christiap ajunnginnera paasissallugu taakkununnga pingaaruteqarpoq. Taanna eqqumavoq, DBU-p pisortaa, Peter Møller oqarpoq.
UEFA naapertorlugu, arsaattartut namminneerlutik unammineq arsaqatiminnut, Christian Eriksenimut, tunngatillugu naammassissallugu aalajangerpaat.
Taannalu unammineq aamma tassaavoq oqaluttuarisaanermi Finlandip unammersuaarnerni unamminera siullerpaaq. Unamminermi Finland ataaseraarluni ajugaavoq, danskit susaartut.