Aasiammiut Avannaata Qimussersuinut peqataassanngitsut

Avannaata Qimussersui Ilulissani sukkaniutilerpata Aasiammiut sukkaniuttartut qamutini issianatik angerlarsimaffimminiiginnartariaqarput. Aasiammiut qimmii tamarmik akiuussutissamik kapitissimanngillat.
Aasiammiut qimussit pingasut peqataasussaajunnaarneranni qimussit 28-it sukkaniutissapput. Assi © : Visit Greenland/Mads Pihl
marsip 03-at 2021 12:15

Avannaata Qimussersui oqaluttuarisaanermi siullerpaamik Ilulissani marsip 27-ani sukkaniuttussaapput. Pilersaarutit malillugit nunatsinni qimmeqarfinneersut tamarmik peqataatitaqartussaallutik.

Tunumiullu qimmii tamarmik akiuussutissamik kapitissimanngillat taamaalillutik sukkaniunnissarsuarmut peqataasinnaajunnaareerput.

Taakkuli kisimiinngillat. Aasianniit aamma peqataasoqassanngitsoq, Kalaallit Nunaanni Qimussertartut Kattuffianni, siulittaasoq, Johan Olsen ilisimatitsivoq.

- Aasiammiut aamma nalunaarput naammattumik isumagineqarsimanngimmata aamma Aasiammut uniinnartut, Johan Olsen KNR-imut oqarpoq.

Tassa imaappoq, Aasiammiut qimmii aamma tamarmik akiuussutissamik kapitissimanngillat.

Aasianni qimussertartut peqatigiiffianni, Qimmeq 76-imi, siulittaasup Hansine Storkip tamanna uppernarsarpaa.

- Kommune Qeqertalimmi teknikkeqarfimmut paasiniaagama paasivara kapoorutissanik Aasianni soqanngitsoq, tikittuulerlutik neriorsoraluarpaatigut kisianni qimussersuaqarnissaanut angummassinnaanngillat, Hansine Stork Inuiaat Tillernerannut oqarpoq.

AAMMA ATUARUK Tunumiut Avannaata Qimussersuini peqataassanngillat

Qimmit akiuussutissamik siullermik kapitinnerminniit qaammat ataaseq qaangiukkaangat kapiteqqereeraangamik aatsaat qimmeqarfinnut allanut pisinnaapput.

Qimmeqarfinni tamani qimminut akiuussutissat pigineqarnissaat kommunit akisussaaffigaat. Tamanna Aasianni Tasiilamilu naammassineqarsimanngilaq.

Peqataaniarunanartoqaraluartoq Avannaata Qimussersui naammassineqassasoq, sukkaniunnissarsuarmut aaqqissuisut Qimussersaq 71-ip siulittaasua, Minik Olsvig Svendsen uppernarsaavoq.

Aasiammiut qimussit pingasut peqataasussaajunnaarneranni qimussit 28-it sukkaniutissapput.

Avannaata Qimussersui aningaasanut ukioq manna inatsimmi 1.3 millionit koruuninik aningaasaliiffigineqarpoq.