Inuit sisamat inuusaliamik ministeriunermut assingutitamik ikuallaasimasutut unnerluutigineqartut

Coronavirus siaruatsaaliorniarlugu killilersuinerit akerliuffigalugit Københavnimi Frederiksbergimilu akerliussutsimik ippassaq arfininngornermi takutitsisoqarmat eqqissiviilliortoqalerpoq.

Inuusaliaq ministeriunermut Mette Frederiksenimut assingusoq Danmarkimi unnukkut arfineq-pingasunut qiteqqutilersoq Københavnimi ikuallatsinneqarpoq. Mette Frederiksenip assinga inuusaliami takuneqarsinnaavoq.

Inuusaliaq allagartamik ikkussiffigineqarsimavoq, oqaasertaalu tassaallutik: "Mette Frederiksen pinngitsoorani toqunneqartariaqarpoq".
Inuusaliamik taama ikuallatsitsisoqarneranut atatillugu inuit pingasut maannamut tigusarineqarsimapput.

Inatsit tunngaviusoq aallaavigalugu Frederiksbergimi eqqartuussisuuneqarfimmi sapaammi ualikkut killisiuisoqarpoq.

Angutit marluk eqqartuussivimmut sassartinneqarput. Taakku politiinit unnuaq tigusarineqarput, pillaasarnermullu inatsimmi immikkoortoq 113 naapertorlugu unnerluutigineqarlutik. Inatsimmi immikkoortoq taanna naalakkersuisunut saassussinermut tunngassuteqarpoq.

Inatsimmi immikkoortumut taassumunnga pineqaatissiinermi ukiuni 16-ini parnaarussassanngortoqarsinnaavoq, unnerluutigineqartulli pinngitsuunerarput.