Partii Naleraq Demokraatillu utoqqatsertoqarnissaanut naaggaartut

Ministeriunerup, Mette Frederiskenip danskit naalagaaffiata misileraaqataasimanera sapaatit akunnerata siuliani utoqqatsissutigereeraalu taama nalunaaruteqarput.

Meeqqat 22-t Danmarkimut taamani aallartinneqarlutik danskinngorsarneqarput.

Folketingimut ilaasortap, Inuit Ataqatigiinneersup Aaja Chemnitz Larsenip tassunga atatillugu kalaallit politikerii aamma utoqqatsertariaqartut isumaqarpoq. Tamanna ICC-p siulittaasorisimasaata, Aqqaluk Lyngep taperserpaa.

Naalli danskit ministeriunerata utoqqatsissuteqarnera pissusissamisooraluartoq Namminersorlutik Oqartussat aamma taamaaliussanngillat. Partii Naleqqamit Pele Broberg taama isumaqarpoq.

AAMMA ATUARUK Ilisimatooq: Utoqqatserneq inunnit aatsaat kissaatigineqarsimaguni iluaqutaassaaq

- Nunarput nunasiaataanitta nalaani aalajangersorsimasanik pisortatigoortumik utoqqatsersinnaanngilaq.

Partii Naleqqameersoq Pele Broberg KNR-imut taama oqarpoq.

Kalaallit utoqqatsissuteqarnissaat Demokraatinit aamma taperserneqanngilaq.

Danskimmi naalagaaffiata misileraanermut akisussaaffimmik tigusinera naammattoq, Malene Vahl Rasmussen oqarpoq.

- Taamani landsrådiusumut ilaasortaasut misileraanerup kingunerisinnaasai sukumiisumik ilisimasaqarfiginngilaat, allaffissornikkullu siunnersorteqaratik.  Taamaammat Nunarput utoqqatsertariaqanngilaq, Inatsisartut Ilaqutariinnermut Peqqissutsimullu Ataatsimiititaliaata siulittaasuat Demokraatineersoq Malene Vahl Rasmussen KNR-imut oqarpoq.

AAMMA ATUARUK Nunarput utoqqatsissava? Aap, Aaja Chemnitz Larsen oqarpoq

Siumup kalaallit utoqqatsissuteqarnissaat qanoq isumaqarfigineraa KNR-imit apeqqutigaarput. Taakkunanngalu partiip siulersuisuisa suliaq ualimut aatsaat oqallisigissagaat akissutigineqarpoq.

Partiip siulittaasuata, Erik Jensenip oqarnera naapertorlugu Siumut apeqqummut tamatuma kingorna ersarissumik akissutissaqarumaarpoq.