- Pisariaqartilaarparput aamma politikkiinnaanngittoq kisianni immitsinnut qanilaarluta, erinarsoqatigiilluta persuarsiulaarlutalu. Uani ataatsimeersuarnissaq eqqarsaatigalugu pisussap atatillugu malunnartinniarlugu taanna pisussaq, Inga Dora Markussen oqarpoq.Foto: Siumut Nuuk

Siumut Nuuk sapaatiuppat nereqatigiinnissamut qaaqqusisoq – Kielsenili allanik pilersaaruteqartoq

Siumut Nuup partiimut siulittaasunngorniartut pingasut sapaatiuppat qinersisartunik ataatsimiititsinissamut qaaqquai. Erik Jensen Vivian Motzfeldtilu qaaqqussummut qujassuteqarput.

Siumup nuna tamakkerlugu Nuummi ataatsimeersuarnissaa sapaatip-akunnerata tulliani aallartissaaq. Siulittaasunngorniartut pingasuupput: Tassalu Erik Jensen, Vivian Motzfeldt aamma Kim Kielsen.

Siumut Nuuk nuna tamakkerlugu ataatsimeersuarnissamut sapaatip-akunnera sioqqullugu sapaatiuppat aaqqissuussiniarpoq. Siulittaasussatut qinigassanngortittut takkunnissamut imminnullu oqaluttuarinissaminnut qaaqquneqarput.

- Immineq ilisaritissapput, nalunngikkaluarpagut kikkuusut, kisianni annerusumik qanoq takorluugaqarnersut aamma inuppalaartumik imatut politikkikkut siunertat tikinngikkaluarlugit, kisianni suna uummammiuneraat tusarusullutigu, Siumut Nuummi siulittaasoq, Inga Dora Markussen oqarpoq.

Assi: Nunat Avannarliit Killiit Siunnersuisoqatigiivi / Inga Dora Markussen.

- Pisariaqartilaarparput aamma politikkiinnaanngittoq kisianni immitsinnut qanilaarluta, erinarsoqatigiilluta persuarsiulaarlutalu. Uani ataatsimeersuarnissaq eqqarsaatigalugu pisussap atatillugu malunnartinniarlugu taanna pisussaq.

Kim allanik pilersaaruteqartoq

Erik Jensenip Vivian Motzfeldtillu qaaqqussut qujassutigalugu sisamanngornermi ullaap-tungaani nalunaarutigaat. Kim Kielsenili partiimi maanna siulittaasoq sapaatiuppamut allanik pilersaaruteqartoq, Inga Dora Markussen oqarpoq.

- Kim aamma qaaqqunikuuvarput, ajoraluartumik ulloq taanna pisassaqarsimagami. Kisianni piffissaqaleriataassaguni takkunnissaminut ammavoq.

KNR-ip Kim Kielsen sisamanngornermi ualikkut oqaaseqartinniarsarigaluarpaa, tamannali iluatsinngilaq.

Qinersisartunut ataatsimiititsineq Illorpumi nalunaaqutaq 12-imit 15-imut ingerlanneqassaaq.

Ataatsimiititsinermi nerisassallertoqassaaq. Inersimasunut peqataaniartunut 50 koruuneqarpoq meeqqamullu 25 koruuneqarluni.

Corona pillugu malittarisassat pissutigalugit Illorpumi peqataasut amerlanerpaamik 60-iusinnaapput.

Siumut Nuup nuna tamakkerlugu ataatsimeersuarnermi kina qinissanerlugu suli aalajanginngilaa.

- Tusaqqaalaarusuppagut, nalunngikkaluarpagut kikkuusut, kisiat annerusumik aamma mannakkut unammilligassaqaratta inuiaqatigiinni aamma tusarusullutigut, soorunami taanna ataatsimeersuarnermi tikinneqarsinnaanissaa naatsorsuutigivarput, Inga Dora Markussen oqarpoq.

Siumumut siulittaasunngorniartut

Siumup nuna tamakkerlugu Nuummi ataatsimeersuarnissaa sapaatip-akunnerata tulliani tallimanngornermi aallartissaaq, tassanilu siulittaasussamik siulersuisussanillu toqqaasoqassalluni. Siumumi sinniisut 70-it missaanniittut atorfillillu ataatsimeersuarnermi peqataassapput.

Vivian Motzfeldtip Kim Kielsenillu akornanni pasisaattoqartoq KNR-ip sapaatip-akunnerata naanerani oqaluttuaraa.

Vivian Motzfeldt Kim Kielsenimit partiimit peersitaanissaminik ilaatigut siorasaarneqarsimalluni oqaatigaa.

Kim Kielsenip politikkikkut ingerlavini marlunnik siunnersuuteqarnikkut naqissuserpaa: Siullermik nunanit allanit suliartorlutik nunatsinnukartut nunatsinni suliniarunik kalaallisut ilinniassasut saqqummiuppaa.

Tassani siunnersuuteqarnermini Siumumi Naalakkersuisunilu siulittaasutut tunuliaqutaqarpoq. Demokraatilli isornartorsiuipput, taamalu nalunaaruteqarnini nammineq akisussaaffigissagaa oqaatigalugu.

Kim Kielsen siunnersuummik nassiussaqaqqippoq – tamatumuuna Siumut siulittaasuatut. Siunnersuummi nunaqarfinni inuttaasut internet aqqutigalugu ilinniarnissaat kaammattuutigaa.

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt