Nakorsat sulerulutsinneqartut napparsimmavinni artukkerneqarnertik oqaatigivaat

USA-mi napparsimmaviit coronavirusimik tunillatsissimasunik amerlanerat pissutigalugu artukkerneqarsimapput, cafeteriat, utaqqisarfiit, gangit biilillu unittarfii inunnik passussisarfittut maanna atorneqartariaqalersimallutik.

Nutaarsiassaqartitsivik AP taama allaaserisaqarpoq.

Napparsimmavinni pissutsit ullormiit ullormut artornarsiartuinnarput, coronavirusilu USA-mi tuniluunnerujartuinnarluni.

USA-mi coronavirusimik nappaateqarlutik toqusut ippassaq pingasunngornermi 250.000-it sinnerpaat. Napparsimmavinnut unitsinneqartut aatsaat taama amerlatigilerneranni tamanna pivoq.

Napparsimmavinni unitsinneqartut amerlangaarmata, napparsimmavinni sulisut napparsimmavinni allani suleqatiminnut allaat sianertalersimapput napparsimasut inissaannik ujarlerlutik. Sulisut sulerulutsinneqarput, inuillu qasullutik. Nutaarsiassaqartitsivik AP taama allaaserisaqarpoq.

- Nikallungavugut qasulluinnarlutalu, Alison Johnson, Tennesseemi peruluttut Johnson City Medical Centerimi aqutsisoq oqarpoq.

USA-mi napparsimmavinnut unitsinneqartut qaammatip kingulliup ingerlanerani marloriaatinngorsimapput, USA-milu napparsimmavinni unitsinneqarsimasut marlunngormat 70.000-it sinnerpaat.

Coronavirusimillu tunillanneqarsimasut sapaatit-akunneri marluk ingerlaneranni 80 procentinik amerlisimallutik, agguaqatigiissillugit ullormut 160.000-t sinnertarlugit.

Coronavirusimik toqquteqartut USA-mi akunnerit 24-t ingerlaneranni agguaqatigiissillugit 1155-iusarput.