Bangkokimi inuit arlaqartut aqqusinerni aporaannerni aallaaneqartut
Thailandip illoqarfiisa pingaarnersaanni Bangkokimi akerliussutsimik marlunngornermi takutitsisoqarmat, inuit 55-init ikinnerunngitsut aqqunartiterput, amerlasuut aallaaneqarlutik. Erawanip napparsimmavia taama ilisimatitsivoq.
Akerliussutsimik takutitsisut politiillu aqqusinerni aporaannerisa saniatigut, akerliussutsimik takutitsisut immikkoortullu kunngikkormiunik pingaartitsisut akornanni aamma aporaattoqarpoq.
Bangkokimi juulimi eqqissiviilliortoqalermalli aatsaat taama eqqissiviilliortoqartigaaq. Akerliussutsimik takutitsisut ministeriunerup Prayuth Chan-ochap tunuarnissaa nunallu tunngaviusumik inatsisissaanik nutaamik inatsiseqalernissaa piumasaraat, kunngillu Maha Vajiralongkornip piginnaatitaaffiisa killilersorneqarnisssaat aamma piumasaralugu.
Thailandimi naalakkersuisut tunuarnissaannik piumasaqaat alliartuinnavissimavoq, nunallu immikkoortuisa sinnerinut aamma siammaassimalluni.
AAMMA ATUARUK Thailandimi uppititsisoqareersorlu qinersisoqartussanngortoq
Prayuth Chan-ocha Thailandip naalakkersuisuinik 2014-imi uppisitsilluni ministeriuninngorpoq, akerliussutsimillu takutitsisut taanna pillugu akerliussutsiminnik takutitseqqikkumaarlutik oqaatigaat.
Thailandimilu kunngikkormiuni aaqqissuusseqqittoqarnissaanut piumasaqaateqarnissamut taassuma saniatigut tunuarsimaartoqarunnaariartorpoq.
Thailandimi ilinniartut sinnerlugit sukataarutiginnittoq, Parit "Penguin" Chiwarak, Bangkokimi niuerniarfiit eqqaanni pingasunngornermi ualikkut akerliussutsimik takutitsisoqaqqinnissaanik kaammattuteqarpoq.
Thailandip tunngaviusumik inatsisaanut allannguutissatut siunnersuutit arlallit Thailandip inatsisartuini marlunngornermi oqaluuserineqarput, taamaalineranilu inuit tuusintilikkaat inatsisartut ataatsimiittarfiata silataani katersuussimallutik.
Nunalli tunngaviusumik inatsisaata allanngortinniarnissaa sivisussaaq ajornakusuussallunilu. Senatillu naalakkersuisunik uppisitsinikunik sakkutuunik ilaasortaqarmat tunngaviusumik inatsisissatut siunnersuut akuersaarnaviarunanngilaa.