Danmarkimi naalagiartitsinerit tamarmik danskisuunngikkunik danskisuumut nutserneqartalissapput. Danskit naalakkersuisui taama siunnersuuteqarput. Tamanna kalaallisut naalagiartitsisarnermut aamma atuutissanersoq suli ilisimaneqanngilaq. Assi Københavnimi Holmens Kirkemi siorna M/S Hans Hedtoftimi ajunaarsimasut eqqaaniarneqarneranni assilisaavoq.Foto: KNR / Foto: Jonas Fievé

Danskit oqaluffiini kalaallisut naalagiartitsisarneq aarlerinartorsiorsinnaasoq

Danmarkimi upperisani tamani naalagiartitsinerit tamarmik danskisuunngikkunik danskisuumut nutserneqassasut danskit naalakkersuisui aarlerisaaruteqarput. Tamanna nunat avannarliit politikeriinit isornartorsiorneqarpoq.

Danmarkimi naalagiartitsinermi qinngarsuinissamut, peqqarniisaarnissamut, assigiinngisitsinissamulluunniit kaammattuissagaluarpata paasineqarnissaat periarfissaassaaq.

Danskit naalakkersuisui  Danmarkimi naalagiartitsinerit tamarmik danskisuunngikkunik danskisuumut nutserneqarnissaannik qulakkeerinissamik siunnersuuteqartut taama isumaqarput.

Tamanna kalaallisut savalimmiormiusullu naalagiartitsinermut aamma atuutileratarsinnaavoq.

Tamanna savalimmiormiut folketingimut ilaasortaata, Sjúrður Skaalep Javnaðarflokkurininngaanneersup ministeriunermut, Mette Frederiksenimut (S) sapaatip akunnerata siuliani apeqquteqarnerani saqqummerpoq, taassuma ministeriuneq piumasaqaammik Danmarkimi savalimmiormiut iligiivinut atuutsitsissannginnermik qulakkeerissanersoq aperaa.

LÆS OGSÅ Katti Frederiksen som ny naalakkersuisoq: Jeg er overraskende rolig

Frederiksenilli tamanna qulakkeerlugu oqaatigerusunngilaa.

- Naamik, neriorsuutigisinnaanngilara. Aamma naak Danmarkimi savalimmiormiusut naalagiartitsisoqartariaqarneranut misiginneqataallungalu ataqqinnikkaluarlunga – aamma tassunga atatillugu ajornartorsiuteqarnermik tusagaqarnikuunngisaannaraluarlunga.

Taassuma Danmarkimi nunanilu allani moskéni ataasiakkaani qinngarsuinissamut peqqarniisaarniarnissamullu kaammattuisoqartarneranik siunnersuut pissuteqarnerarpaa.

Danmarkimi kalaallit palasit
 

Danmarkimi kalaallit palasit marluk atorfeqarput.

Marianne Krogh Aarhusip biskoppeqarfiani decembarip aallaqqaataaniit palasiulerpoq. Taassuma Danmarkimi kalaallinut innuttaasunut tamanut kalaallisut naalagiartitsinerit, matumani kuisitsineq, ilisineq katinnerlugu ilanngullugit isumagisarpai.

 

Taassuma Oline Berthelsen 2020-mi februaarimi soraartoq taarserpaa.

 
Jens-Kristian Kleist Namminersorlutik Oqartussat Danmarkimi palasitut atorfeqartitaraat. Taassuma kalaallit innuttaasut Danmarkimi nammineq piumassuserinngisaminnik najugaqartut assersuutigalugu napparsimasut parnaarussivimmiittullu pulaartarpai oqaluffimmullu attuumassuteqartunik sulissuteqarfigisarlugit.  

Ministeriunerulli akissutaa pillugu Sjúrður Skaale akerliliivoq.

- Savalimmiormiut ilagiivisa oqaluffiatalu pasineqarnera pissutigalugu naalagiartitsinerit nutserneqartalissappata taama suliaavoq sapinngisara tamaat malinnaaffigerusutassara. Tamanna quianaannarpoq, Savalimmiunit ilaasortaq oqarpoq.

Inatsisissatut siunnersuutip annikitsortai amigaataasut

Folketingip inatsisissatut siunnersuut februaarimi oqallisigissavaa, inatsisissatut siunnersuut suli piareerneqanngilaq.

Taamaammat siunnersuutip annikitsortarpassui suli qulakkeersimanngillat. Ilaatigut kalaallisut, savalimmiormiusut – immaqalu tyskisut naalagiartitsinerit – inatsimmit ilaatinneqassannginnersut, naalagiartitsinerillu danskisuumut nutserneqarnissaannik naalakkersuisut qanoq qulakkeerissanersut.

LÆS OGSÅ Nyvalgt biskop: Det er en stor ære

Aammattaaq danskisuunngitsumik naalagiartitsisoqarnerani qanoq pillaateqartoqassanersoq suli ilisimaneqanngilaq.

Danskilli ilageeqarnermut ministeriat, Joy Mogensen (S) Sjúrður Skaalemut akissuteqaammini allappoq:

- Inatsisissatut siunnersuut qanorpiaq ilusilerneqarsinnaanersoq suli misissorparput, aamma taamaammat qanorpiaq ilusilernissaa oqaatigissallugu suli siusippallaarpoq. Naalagaaffeqatigiinni oqaatsit immikkut ittumik periarfissinneqarsinnaanersut qulaajaanissami ilaapput.

Folketingimut ilaasortaq, Aaja Chemnitz Larsen Inuit Ataqatigiinniit ilageeqarnermut ministerimut aamma apeqquterpaaloqarpoq, taassuma kalaallit savalimmiormiullu oqaasii naalagaaffeqatigiinni Naalagaaffiit Peqatigiinnilu akuerisaasut ilaatigut erseqqissaatigaa.

Taamaammat danskit naalakkersuisui oqaatsit danskisuumut nutserneqassappata tamanna nunat tamalaat akornanni upperneq killiligaananilu oqaaseqarsinnaatigaaneq pillugu isumaqatigiissutinut naapertuunnersoq misissuisikkusuppaa.

Kommentarer

inatsisartut-sal-sep2019.jpg

Inatsisartuts Efterårssamling



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt