Skotlandip namminiilivilernissaa tapersersorneqarluartoq

Skotlandip Tuluit Nunaannit avissaarluni namminiilivittunngornissaa, Skotlandimi qinersisartut akornanni amerlanerussuteqarluartut tapersersorpaat.

Inunnik isumasiuinerup nutaap tamanna takutippaa.

Apersorneqartut 58 procentii isumaqarput Skotland namminiilivittunngortariaqartoq, 42 procentillu isumaqarlutik Skotland Tuluit Nunaannut ataannassasoq.

- Skotlandip namminiilivittunngornissaanik tapersersuisut amerliartupiloorsimapput. Aatsaat taama amerlatigisut Skotlandip namminiilivittunngornissaa tapersersorpaat, Skotlandimi Ipsos Morip pisortaa Emily Gray oqarpoq.

Skotlandimi innuttaasut Skotland namminiilivittunngussanersoq pillugu 2014-imi taasitinneqarput.

AAMMA ATUARUK Boris Johnsonip skotlandimiut namminiivilittunngorusunnerannut itigartikkai

Skotlandip nammiilivittunngornissaa 45 procentit taamanikkut tapersersorpaat, 55 procentillu isumaqarlutik Skotland Tuluit Nunaannut ataannassasoq.

Skotlandip Tuluit Nunaannit avissaarluni namminiilivittunngornissaanut taamanikkut naaggaartoqarmat oqaatigineqarpoq, Skotlandip namminiilivittunngoraluaruni EU-mut ilaasortaajunnaarnissaa aarleqqutigineqartoq.

Tuluit Nunaat EU-mi kingorna ilaasortaajunnaarpoq.

Skotlandip nammminiilivittunngornissaanut pilersaarut Skotlandimi innuttaasunut kingusinnerpaamik aappaagu maajimi saqqummiukkumallugu, Skotlandip ministeriunerata Nicola Sturgeonip neriorsuutigaa.

Skotlandimiulli Tuluit Nunaannit avissaarlutik namminiilivittunngornisssartik pillugu innuttaasut taasitinneqarnissaat, Tuluit ministeriunerata Boris Johnsonip arlaleriarluni itigartinnikuuaa.