Gruppip siulittaasua: Siumumi eqqissiviilliorneq kinguneqartinneqassanngilaq

Kim Kielsenimut tatiginnikkunnaarluni taasititsiniarneq atuukkunnaarsinniarlugu taasisoqarnerani Erik Jensen Henrik Fleischerilu taaseqataannginnerat kinguneqartinneqassanngitsoq Siumup Inatsisartuni gruppiani siulittaasoq oqarpoq.
- Ileqqorput malillugu nipituumik oqaluttarpugut. Aporaattutut oqartoqarsinnaanngilaq allaat partiimit aniniarluni imaaluunniit soraarsitaanisamut kinguneqarsinnaalluni, Hermann Berthelsen (S) oqarpoq. Assi © : KNR
oktobarip 16-at 2020 05:21

Naalakkersuisut siulittaasuannut Kim Kielsenimut tatiginnikkunnaarluni oktobarip arfineq-pingajuanni taasititsisoqarmat Siumumit Inatsisartuni ilaasortat marluk taaseqataanngillat, taamaalillutik naalakkersuisooqatigiit ajutoorteratarsinnaaleraluarlugit.

AAMMA ATUARUK Siumut Inatsisartuni ilaasortaatitat amerlanerussuteqartut Kim Kielsenip tunuarnissaanik piumasaqarput

Siumumili tamakku inissaqartariaqartut Inatsisartunit gruppimi siulittaasoq Hermann Berthelsen oqarpoq.

- Ileqqorinngilarput naveersineq kisianni paaseqatigiinniarsarineq ileqqorisarparput. Taamaammat tassaniippugut ilaasortaasunut ajortumilluunniit kinguneqarnissaanik eqqarsartoqarani, Hermann Berthelsen Erik Jensen Henrik Fleischerilu pillugit oqarpoq.

Kim Kielsen uppisinniaraat

Siumumi ilaasortat allat marluk, tassa Vivian Motzfeldt Nikkulaat Jerimiassenilu taaseqataaniaratik aalajangersimagaluarput. Taamaalilluni Kim Kielsenimut tatiginnikkunnaartut amerlanerussuteqartussanngoraluarlugit.

Piffissarli kingulleq atorlugu Vivian Motzfeldtip isummani allanngortippaa.

2018-imi qinersisoqarneranili politikikkut eqqissiviilliorneq:

 

  • Septembarip qulingiluaat 2018: Partii Naleraq mittarfiliortiternissamut suliaq isumaqataaffiginagu naalakkersuisooqataajunnaarpoq.
  • Oktobarip 17-iat 2018: Doris J. Jensen peqqissutsimut, isumaginninnermut inatsiseqarnermullu naalakkersuisuuffimminit benzinamut akiliutini atornerlussimanera tunuassutigaa.
  • Apriilip qulingiluaat 2019: Atassut naalakkersuisooqataajunnaarpoq. Nikkulaat Jeremiassen aalisarnermut naalakkersuisutut tunuarpoq.
  • Augustip 13-iat 2019: Siumup inatsisartuni ilaasortaatitaasa arfineq-marluk Kim Kielsen Siumumi siulittaasutut tunuaqquaat.
  • Maajip 27-at 2020: Partii Naleraq aalisarnermut, piniarnermut nunalerinermullu naalakkersuisumut Jens Immanuelsenimut tatiginnikkunnaarnermik taasititsipput.
  • Oktobarip arfineq-pingajuat 2020: Inatsisartuni illuatungiliuttut tamarmiusut Kim Kielsenimut tatiginnikkunnaarnermik taasititsipput. Taanna amerlanerussuteqaqqalaartunit annaanneqarpoq.

- Inunnut ataasiakkaanut tunngammat taanna annertunerusumik eqqartorsinnaanngilara. Kisianni tamakku pitinnagit oqaloqatigiinnissarput pingaartupilorujussuuvoq.

AAMMA ATUARUK Vivian Motzfeldt Kimimut tatiginnikkunnaarnissaq pillugu: Taamaammat isumaga allanngorpoq

- Isumagali malillugu una ajunngitsumik naammassineqarpoq. Suleriaqqinnissarlu aqqutissaqalerpoq uungalu suliamut tunngatillugu eqqisseqatigiippugut.

- Ileqqorinngilarput naveersineq kisianni paaseqatigiinniarsarineq ileqqorisarparput.

Nipisattassiissutinut suliami Kukkunersiuinermik ataatsimiititaliap Naalakkersuisunut paasissutissat piumasai tunniukkumaneqannginneri Vivian Motzfeldtip taaseqataaniannginnerminut aalajangernerminut pissutaasut KNR-imut oqaluttuaraa.

Paasissutissallu tunniunneqarniartut paasigamiuk piffissaq kingulleq atorlugu isummani allanngortippaa.

Tamannalu Siumumi tusaatissatut tiguneqartoq gruppimi siulittaasoq oqarpoq.

- Inatsisit ilaat assigiinngitsunik paasineqarsinnaanerat aallaavigalugu siunissami paatsoornannginnerusumik ataatsimiitsitaliat Naalakkersuisunut piumasarisinnaasaat sakkortusarniarlugit isumaqatigiippugut. Taamaaliornikkut siunissami assortuussutissat allat pinaveersaarniassagatsigit, Hermann Berthelsen oqarpoq.

AAMMA ATUARUK Kim Kielsen: Advokatfirmaets vurdering er nok

Hermann Berthelsen ukiorpassuarni politikeriusoq, Sisimiut kommuniugallarmat borgmesteriusimasoq Siumumi siorna eqqissiviilliortoqarmat akuuvoq. Taamani Kim Kielsen Siumumi siulittaasutut Inatsisartuni Siumumit ilaasortat arfineq-marluk tunuaqqullugu kaammattorpaat.

Siumulli immikkoortortaqarfiini 61-iusuni amerlanerussuteqartut siulittaasortik taperserpaat.