Ukiornissaanut peqqumaatissat Ittoqqortoormiinut suli apuussinnaanngitsut

- Ittoqqortoormiit eqqaanni siku suli ajornartorsiortitsivoq.

Royal Arctic Line Facebookimi quppernermini marlunngornermi allappoq.

Umiarsuaatileqatigiiffiup umiarsuaq peqqumaatissanik useqartoq Ittoqqortoormiit eqqaani sikorsuarnit nikinneq ajuleqqasoq sapaatip-akunnerata siuliani nalunaarutigaa. Malik Arcticali aqaguani sikorsuarnit nikeqqippoq, umiarsuarli nunaqarfiup eqqaani sisamanngormalli uninngalerpoq.

AAMMA ATUARUK Umiarsuaq containerinik useqartoq Ittoqqortoormiit eqqaanni sikumit nikissinnaalersoq

Sikoqarneralu pissutigalugu Ittoqqortoormiinut tikissinnaannginnini pissutigalugu tassani uninngavoq.

- Malik Arcticap, sapaatit akunnerata siulianili Ittoqqortoormiit avataanni sikunik ajornartorsiuteqarluni uninngasup, sikup silallu qanoq innera malinnaaffigeqqissaarpaa. 

- Sikulli qanoq innera pissutigalugu Ittoqqortoormiit suli tikinneqarsinnaasimanngillat. 

Pissutsit pillugit marlunngornermi taama nalunaaruteqarpoq, pingasunngornermilu tamanna allanngungaarsimanngilaq. Ukiornissaanut peqqumaatissat umiarsuarlu Ittoqqortoormiinut talissinnaanngornissaminut suli utaqqivoq.

- Umiarsuup illoqarfimmut tikissinnaannginneranut arlalinnik puttaarsuaqarneranik pissuteqarpoq, 2-3,4 km-inik takissuseqarput meterinillu marlunnik annertunerusumilluunniit issutigalutik, Royal Arctic Line allappoq.

- Puttaarsuit taakku ilaat ataaseq illoqarfimmut qanittuararsuarmiippoq ikkarleqqarpasillunilu, kaanngarlunilu illoqarfiup tungaanut illuariartulissagaluarpat tunuanut peratarsinnaanerput Royal Arctic Linemit pinngitsoortikkusupparput. 

Royal Arctic Linep oqarnera naapertorlugu tallimanngornerup unnuaani avannaq-kangisissumik anorlernissaa naatsorsuutigineqarpoq. Anorip siku kangerlummiit anillatsissinnaavaa, taamaalilluni umiarsuaq illoqarfimmut talissinnaassalluni, umiarsuaatileqatigiiffik allappoq.

Malik Arctica 114 meterinik takissuseqarpoq, containerinillu 20 fodsinik 606-inik useqarsinnaalluni.