Paamiuni ikuallattoqarnerani eqqugaasut tallimat katersuiniunneqartut
Paamiuni inissiat ilaanni septembarip aallaqqaataani ikuallattoqarmat inuit pingasut ajunaarput arlallillu uutiterlutik napparsimmavimmut unitsinneqarlutik.
Inissiaq quleriiaanni sisamanik inissiartaqartumiittoq ikuallappoq. Inissiarlu sisamanik inittarfeqartoq - quleriaanni siullermiittoq ikuallalluni.
Inissiaqarfimmi ikuallattumi inuit ikinnerpaamik 20-upput. Taakkunannga qassiiusut uutiternitik inissianiillu pissinnerminni ajoqusernitik pissutigalugit napparsimmavimmut unitsinneqarput.
Inissiaq ikuallattoqarneranit ajoqusingaatsiarneqarmat inuit tallimat tassani najugaqartut inigisaminniissinnaajunnaarput. Taakku ininut allanut inissinneqarput, taamaakkaluartorli pigisatik ikuallattoqarnerani annaavaat.
AAMMA ATUARUK Paamiuni ikuallattumit annattoq: Annanniarlunga pissippunga
Paamiuni Palasip, Louis Sigurdsenip oqarnera naapertorlugu inissiani najugaqartunit sisamat siusinaartumik soraarnersiaqarput. Tallimaallu soraarnerulluni.
- Soraarninngorsimalluni akissaqarniarneq ajornakusoorsinnaavoq. Taamaammat angerlarsimaffimmini ikuallassimasumi najugaqarsinnaajunnaarsimasut katersuiniullugit aallartippugut, palasi oqarpoq.
Ikuallattoqarnerata kingorna nuuttariaqarsimasut ulluinnarni atugassaminnik, soorlu atisanik oqortunik, oqorutit qaliinik pisariaqartitanillu allanik amigaateqalersimapput, tamannalu pillugu katersuiniunneqalerlutik.
Konto katersuiniussinermi atorneqarsinnaasoq GrønlandsBanken suleqatigalugu pilersinneqarpoq - kontumut 6471-5849877-imut ikisisoqarsinnaavoq.
AAMMA ATUARUK Paamiuni inuit pingasut ikuallattoqarnerani ajunaartut
Qanorluunniit annikitsigigaluamik ikiorsiisoqarsinnaappat qujanassaqisoq, palasi, Looqi Sigurdsen oqarpoq.
Katersuiniussinermi aningaasat katersorneqartut tamarmik ikuallattoqarnerani eqqugaasimasunut ingerlateqqinneqassapput
Ikuallattoqarnerani pujortarneq naneruutilluunniit ikuallattumut aallarniutaasimasinnaapput.
Ikuallattoqarnerani arnaq 61-inik ukiulik angutillu 54-inik 62-inillu ukioqartut ajunaarput.
