Qeqertarsuatsiaat: Nannut toqunneqartut

Pingajoqqat ulluni kingullerni Qeqertarsuatsiaat eqqaanniipput, pingajoqqallu ullaaq manna aallaaneqarput.

Pingajoqqat Qeqertarsuatsiaat eqqaanni seqqorfigalugit ataasinngormalli qimaatinneqaqattaaraluarlutik nunaqarfiup eqqaanut uteqqittarput.

Unnuarlu uteqqissimapput, kalaalimineerniarfimmi nunaqarfimmiullu peqqumaataannik unnuaq nerisimallutik.

Nauja Møller KNR-imeersoq taama oqarpoq. Taanna sisamanngornermi nunaqarfimmiippoq, nunaqarfimmiumillu tallimanngornermi ullaakkut sianerfigineqarpoq.

AAMMA ATUARUK Qeqertarsuatsiaani nannut toqqissisimanngissutigigaat: Uteqqippatami

- Qeqertarsuatsiaarmiut Facebookikkut toqqaannartumik immiusseqattaarput. Imminnullu allaffigisaqattaarput ima: Nannut silatitsinniipput. Aniniaqinasi, Nauja Møller oqarpoq.

Qeqertarsuatsiaarmiut pingajoqqat qimaateqqinniarsimagaluarpaat, tamatumuunali iluatsinngitsumik.  

Nunaqarfiup iluani nannut aallaaneqarput. Nerisimallutik tasersuup eqqaani innangaartut ullaaq siumoneqarput. Qatserisartut ATV-ata siggartaatai ikillugit qimaatinniarneqarput, nannullu soqutigisaqanngillat. Qimaatinniarneranilu seqqoqattaarfigineqaraluarput qimaanatillu. Tamaalilluni aallaallugit toqunneqarput.

- Atertap aappaa nalulluni qimaavoq, taannalu umiatsiaaqqat pingasut atorlugit maanna malersorneqarpoq, Nauja Møller ullaaq oqaluttuarpoq.

Taanna maanna toqunneqareerpoq.

Namminersorlutik Oqartussat nannunik piniarneq illersuinerlu pillugit nalunaarutaat naapertorlugu nannut eqqissisimatitaapput.

Piaqqat arnaminnik pisariaqartitsisut arnavissallu ataatsimik arlalinnilluunniit piaqqisartut ukioq naallugu eqqissisimatitaapput.

Aalisarnermut, piniarnermut nunalerinermullu naalakkersuisoqarfilli "nanoq ajornartorsiutaasutut" nalilerneqarpat immikkut akuersissuteqarsinnaavoq.

Naalakkersuisoqarfik ullaaq manna taama akuersissuteqarpoq.

KNR-ip aalisarnermut, piniarnermut nunalerinermullu naalakkersuisoqarfik ippassarli oqaaseqartinniarsaraa. Tamannali ullumikkut aamma periarfissaanngilaq.