Ruslandip qaammataasiamik avataarsualiartitsinissaraluani kinguartikkaa
Qaammataasiap Issittumi silap pissusianik nakkutiginninnermut atorneqartussap avataarsualiartinneqarnissaa Ruslandimit kinguartinneqarpoq.
Qaammataasiap avataarsualiartinneqarnissaa sooq kinguartinneqarnersoq nassuiaatigineqanngilaq. Nittartagaq Arctic.ru taama allappoq.
Qaammataasiaq Arktika-M Kasakhstanimi avataarsualiartitsisarfimmit Baikonur Cosmodromemit avataarsualiartinneqartussaagaluarpoq, avataarsualiartinneqarnissaali piffissaligaanngitsumik kinguartinneqarluni.
AAMMA ATUARUK Danskit sakkutuuisa timmisartuat Ruslandip Issittumi soqutigisaqarfiani sungiusartoq
Qaammataasiap avataarsualiartinneqarnissaanut nutaamik kingusinnerusukkut ulluliisoqarumaartoq, russit avataarsualiartitsisarfiata Roscosmosip ilisimatitsissutigaa.
Qaammataasiap Arktika-M-p nunarsuaq kaaviaalertussaagaluarpaa, Qalasersuaq Sikuiuitsoq Kujallerlu qulaattartussanngoraluarlugu, Issittoq Sikuiuitsoq Kujallerlu nakkutigilertussaagaluarlugu.
Sumiiffinni taakkunani silap pissusianik siulittuisarnerit pitsanngortinniarneqaraluarput, soorlu aamma paasissutissanik amerlasuunik silap pissusianut tunngasunik katersisoqarnissaa siunniunneqaraluartoq.
Silap pissusiata allanngoriartornerata ilisimasaqarfigineqarnerulernissa Arktika-M-ip atorneqalerneratigut neriuutigineqarpoq.
Arktika-M Ruslandip Issittumik soqutiginninneruleriartornera ilutigalugu atorneqalertussaavoq. Qaammataasiarlu alla 2023-mi aamma avataarsualiartinneqassamaarpoq, qaammataasiallu allat pingasut aamma sananeqartussatut pilersarutigineqarlutik.