Grækerit ministeriunerat qimaasut ineqarfissaannik atuutiinnartussamik pilersitsinissamik neriorsuisoq
Moriami qimaasunut ineqarfimmi sapaatit-akunnerata siuliani ikuallarujussuartoqareersoq, Grækenland qimaasut ineqarfissaannik atuutiinnartussamik qeqertami Lesbosimi pilersitsiniarpoq.
Grækerit ministeriunerat, Kyruakos Mitsotakis, sapaatiummat taama oqarpoq. Europami nunat suliamut peqataanissamut aamma kajumissaarai, nutaarsiassaqartitsivik Ritzau allappoq.
Qimaasunut ineqarfiit ikuallattut taarserlugit sanaartupallanniarneq sumiiffimmi oqartussaasunit Lesbosip qimaasunit najuuffigineqarnissaanik kissaateqarunnaarsimasunit maannamut unitsinneqartarpoq.
AAMMA ATUARUK Tyrkiap præsidentiata qimaasut millionikkaat EU-mut isertinniarai
Europami nunat aqqanillit meeqqanik ilagineqanngitsunik 400-nik, Moriami qimaasunut ineqarfimmiissimasunik, tigusinissamut piareeqqallutik nalunaarutigereerpaat. Danmark taakkununnga ilaanngilaq.
Ikuallattoqareersoq nunamut qimaasutut isernissamut qinnuteqartut tuusintilikkuutaat narsaanni, aqquserngup eqqaani matullu ammarnani sinittarput. Taakkunannga arlallit nutaanik qimaasunut ineqarfiliortoqarnissaanut akerliussutsimik takutitsipput, Grækenlandillu qeqertaata avataani nunassinneqarnissaminnik piumasaqarlutik.
Grækerilli ministeriunerat tamatumunnga itigartitsivoq.
- Qimaasut ineqarfissaat pinngitsoorani atuutiinnassaaq, tamannalu tamatumani susassaqartunut tamanut nalunaarutigissavara, Mitsotakis sapaatiummat oqarpoq.
