RAL: Nuuk umiarsualivissuaqaleraluartoq nassiussineq akikinnerulinngitsoq
Nuuk 2017-imi umiarsualivittaarsuaqaleraluartoq aamma Royal Arctic Linep islandimiut umiarsuaatileqatigiiffiallu assartuusseqatigiileraluartut, nunatsinnut nunatsinniillu nassiussineq akikinnerulinngilaq.
Attaveqaqatigiinnermut naalakkersuisup, Karl Frederik Danielsenip, Jens Napãtôrmut Partii Naleqqameersumut akissutaani tamanna allaqqavoq.
AAMMA ATUARUK Sikuki Nuuk Harbour naammassineqarpoq
Nassiussinerli Sikuki Harbourimut nioqqutissanik akitsuusiinermut, kiisalu nunani
tamalaani inatsisit tunngavigalugit nammineq piumassutsimik uppernarsaasiinermut
tapiliussap atuutsinneqalernerani 2015-imi aggustip qaammataani akitsuallattoq, naalakkersuisoq allappoq.
Nunatsinnut nassiussineq akitsortoq
- Avannamut nassiussineq 0,9%-imik 2015-imi aggustip kingorna akitsuallappoq,
tassalu akit tamarmiusut ineriartornerinit appasinnerusumik.
- Tamanna ilaatigut nutaanut aningaasaliinissamik pisariaqartitsinnginnerulerniarluni Imarpiup avannaani
suleqatigiinnermik peqquteqarpoq, naalakkersuisoq allappoq.
AAMMA ATUARUK RAL-i Islandimiullu umiarsuaatileqatigiiffiat suleqatigiinnissaat akuerineqartoq
Royal Arctic Linep assartuusseqateqalernerata iluaqutissartai akikillilerinikkut anguneqanngitsut, nassiussinerli assartuusseqateqalersimanngikkaluaraanni maannamut sanilliullugu akikinnerulersimassanngikkaluartoq, taanna allappoq.
Royal Arctic Linelu 800 millionit koruuninit amerlanerusunik toqqaannartumik
aningaasaliissuteqarsimasoq, tamannalu atuisut aningaasartuuteqarnerulernerannik
kinguneqanngitsoq, Karl Frederik Danielsen erseqqissaavoq.
880 millionit koruunit 2015-ip 2019-illu akornanni aningaasaliissutigisimagini, Royal Arctic Linep KNR-imut ilisimatitsissutigaa.
Taakkunannga 760 millionit koruunit RAL-ip umiarsuarnut aningaasaliissutigai. Umiarsuit pineqartut tassaapput Nanoq Arctica aamma Tukuma Arctica, taakkualu ukioq manna tunniunneqarput. Nunaqarfinnullu pajuttaatitaassai pilersaarutit malillugit ukioq manna aappaaguluunniit tunniunneqassapput.
Aamma 120 millionit koruuninik containerinut, atortussanut, attaveqatigiinnermut atortunut allanullu 2016-ip 2019-illu akornanni aningaasaliissuteqarpoq.
Tunulu ukioq mannamiit sapaatit akunnikkaartumik angallavigineqartalissallunilu pitsaanerusumik sullinneqalissasoq, naalakkersuisup aamma erseqqissarpaa.
