Nunavummi politikeri: Inissiat pitsanngorsarneqartariaqarput
Inissianik pitsaasunik amigaateqarnerujussuaq Mumilaaq Qaqqaq nunaqarfinnut tallimanut tikeraarami uppernarsivaa.
Nunaqarfinni tallimani tikeraagaani tamani inissianut pitsaanerusunut utaqqisut 100-uupput. Tassa utaqqisut katillutik 500-it missaaniipput.
Canadamiut ministeriunerat, Justin Truduau Nunavummut siorna tikeraarpoq, taassumalu Nunavummi naalakkersuisut suleqatigalugit nutaanik illuliortitsinissamut 290 millionit dollarsit tassa 1,4 milliardit koruunit neriorsuutigai. Nittartakkatigut nutaariassaqartitsivik, CTV news taama allaaserisaqarpoq.
Maanna ukioq ataaseq qaangiussimalerpoq, susoqarpallaaranilu taamaattumik ajornartorsiutip annertuup malugineqarnissaa ersersinniarlugu Mumilaaq Qaqqaq atsiornernik katersiluni aallartippoq.
Pitsaasumik angerlarsimaffeqarsinnaatitaaneq
Inatsisartunut ilaasortap illuni erngup kuuffii manngertornisut, iikkat isugutattut oquttullu inoqatigiit nittartakkatigut attaveqatigiittarfiannut assilisani takutippai illullu ”karsitut oquttutut” taallugit.
Inuit peqqinnartumik isumannaatsumillu angerlarsimaffigissaarnissartik pisinnaatitaaffigigaat Twitterikkut allaaseraa.
Najugaqarfinni inuiaqatigiit sapinngisaminnik iliuuseqarput, isumalluutaalli killeqangaatsiarput
Canadallu naalakkersuisui annikippallaamik iliuuseqarput, Twitterikkut allappoq.
Mumilaaq Qaqqap naggueqatigiit inuit inuuniarnermikkut atugaasa pitsaanerulernissaat pillugu 2019-imi qinigaagamili sulissutigilerpaa.
