Nukissiorfiit Kangaatsiamut imermik aalaakkaasumik pilersuissalluni neriorsuisoq

00:00:18

Kangaatsiami innuttaasut aalisakkanillu suliffissuaq ukiuni kingullerni imermik sipaartariaqarsimapput imeqarfik iloqarfiup eqqaaniittoq nittaallanik sialummillu immiisarnerat naammassimanngimmat.

Tamanna unammillernarsimavoq, tassami innutaasut imissaqarnissaat qulakkeerniarlugu Royal Greenlandimut imermik pilersuineq Nukissiorfiup marsimi matusariaqarsimavaa.

Maanna Nukissiorfiit tatsimut Kangaatsiamit 5,5 kilometerisut ungasitsigisumiittumut erngup aqqutaanik pilersitsipput.

- Tassa imaappoq illoqarfik aalisakkanillu tunisassiorfik naammattumik imissaqalissapput, Kenneth Nyland, Nukissiorfiit teknikkimut pisortaq taama oqarpoq.

Milluaasut imeq tatsimiit illoqarfimmit ungasissumiittumit milluagaat tatsimut qaninnerusumut, ukiuunerani sillimmataasartumut kuutsinneqartarpoq.

PIlersaarutaavoq, imeqarfik Kangaatsiamut qanittumiittoq aasaanerani imeqarfimmit ungasinnerusumiittumit immerneqartassasoq, taamaalilluni angerlarsimaffinni aalisakkanillu suliffissuaq naammattumik imermik pilersorneqarsinnaalerlutik.

- Massakkutut aaqqiinitsigut Kangaatsiami innuttaasut inuussutissarsiornerlu isumannaatsumik aalaakkaasumillu imermik pilersorneqarsinnaalerput, aammalu tamatuma seqerngup nukinga atorlugu pinissaa qulakkeerneqarluni, Nukissiorfimmit taama oqarput.

Imermik pilersuineq mingutitsinnginnerusumik pisalissaaq illuaqqat imermik milluaasut seqinermit nukiliorfinnit qanittumi ikkussorneqartunit innaallagissamik pilersorneqassammata.

Kangaatsiami innuttasut 540-it missaaniipput.