Googlep nipilersukkat Nunatsinneersut Danmarkimeersullu Youtubemiikkunnaarsikkai
Kodamut ilaasortat nipilersuusiaat tamarmik Danmarkimi tusarnaarneqarsinnaajunnaarput.
Taakkununnga kalaallit Kodamut ilaasortat nipilersuusiaat ilaapput, taamaalillutik naliginnaasumik Youtubekkut tusarnaarneqarsinnaasaraluartut maanna tusarnaarneqarsinnaajunnaarput.
Tamanna Kodami attaveqaqatigiinnermut pisortap, Eva Heinip KNR-imut uppernarsarpaa. Kodami erinnianut taalliortunullu piginnittuuvoq.
YouTube Googlep pigaa. Kodap Googlellu isumaqatigiissinnaannginnerat tamaanga killititsivoq.
Taamaattumik Googlep, YouTubemut piginnittutut Kodamut ilaasortat danskit kalaallillu nipilersuusiaat tamaasa ullumikkut arfininngornermiit tusarnaarneqarsinnaajunnaarsippai
Tamannali Danmarkimi najugalinnuinnaq atuuppoq, nunatsinnimi suli kalaallit nipilersuusiaat YouTubekkut isiginnaarlugillu tusarnaarsinnaavagut.
Isumaqatigiissutip aprilimi atorunnaartup kingornali, illuatungeriit isumaqatigiissummik nutaamik isumaqatigiinniaraluarput.
Koda naaperltorlugu, Google YouTubemi nipilersuutinik atuinermini Kodamut 70 procenti tikillugu akiliinikinnerorusuppoq.
- Suliffeqarfissuup YouTubep nipilersortartunik akikinaariniarsarinera isertungaanngilaq, Kodap pisortaanera, Gorm Arildsen oqarpoq.
Illuatungeriit isumaqatigiissummik atsioqatigeereerpata danskit kalaallillu nipilersuusiaat Danmarkimi tusarnaarneqarsinnaanngoqqissasut, YouTubemi pisortaq, Dan Chalmers neriorsuivoq.