Norskit umiarsuaanni inuttat 33-it coronamik tunillatsittut
Norskit umiarsuaatileqatigiiffianni Hurtigrutenimi, umiarsuarmi Roald Amundsenimi inuttat 33-it corona virusumik tunillatsissimapput. Inuttalli allat 120-it misissortissimasut tunillatsissimanngitsullu umiarsuaatileqatigiiffiup uppernarsarpaa.
Inuttat 154-it suli umiarsuarmiipput, allanullu akuleruteqqusaanatik. Ilaasut 60-it missaaniittut umiarsuaq ippassaq tallimanngornermi qimappaat, taakkuali aamma ulluni qulini inunnut allanut akuleruteqqusaanngillat.
Umiarsuaq taanna maanna Tromsømiippoq, pulaartoqaranilu.
Umiarsuarmut ilaasunut sulisunullu sapaatit akunnerini kingullerni pingasuni attaveqarsimasut, inuit 380-it maannakkut attaveqarfigineqartut, nutaarsiassaqartitsivik DPA allappoq.
Umiarsuaq 140 meteritut takitigaaq, 530-nillu ilaasoqarsinnaalluni.
AAMMA ATUARUK Hurtigruten Nuummi talittarfeqarusuppoq
Umiarsuaq taanna Roald Amundsen ukioq manna Kalaallit Nunaannukartussaagaluarpoq, pilersaarutinili aappaagumut aggutsip qaammataanut kinguartikkai, hurtigruten.dk allappoq.
