Pinngortitaleriffik: Tuttoqarpallaarpoq
Tuttunniartoqarsinnaannguliivippoq. Tuttunniarneq inuussutissarsiutigalugu sunngiffimmilu piniartunut aggustip ulluisa aallaqqaataanni ammassaaq.
Nunatta kitaani allaaniat qoorortuutik piareerpaat imassaallu pisiarereerlugit umiatsiaat kangerlummut juulip ulluisa 31-anni tallimanngornermi unnuap qeqqarpat ingerlaarnissamut piareersimapput.
Tamanullu tuttut naammalluarput.
AAMMA ATUARUK Nunatsinni tuttut peqqipput – canadamiulli tuttuutaat peqqinngillat
Pinngortitaleriffiup allaatigisaq, Christine Cuylerimit allaaserineqartoq nittartakkamini saqqummersitaani tuttut amerlassusaat ikilisartariaqarsorigaat allassimavoq.
2018-imi 2019-imilu nalunaarsuinerit naapertorlugit nunatta kitaani tuttut 140.000-it 165.000-illu missaanniipput.
Tuttoqarpallaartorlu, Pinngortitaleriffik naliliivoq.
- Tamakku tamarmik peqqutaallutik maannarpiaq nunatsinni tuttut amerlavallaarput, nerisassaalatsilersinnaalerlutillu, Pinngortitaleriffik allappoq.
Pinngortitaleriffiup immikkoortortaqarfiani pisortap, Fernando Ugartep tuttut qanoq ikilitigissanersut kisitsisilerusunngilaa. Ikilingaatsiassappulli.
Immaqa affaat imaluunniit?
- Aap, immaqa affaat, Fernando Ugarte KNR-imut oqarpoq.
Kulavaat aallaaneqaqqusaanngitsut
Imaanngilarli tuttut takuneqartut tamarmik aallaaneqarsinnaasut.
Kulavaammi aallaaneqassanngillat, tuttummi taakku tulliani aavartoqarnissaanut tuttoqassutsimut qulakkeerisussaapput.
Tuttuttat 2013-imit 2018-imut nalunaarsorsimasut
2013: 11.325
2014: 12.961
2015: 12.097
2016: 12.008
2017: 12.460
2018: 9.921
Tusarfik: Aalisarnermut, piniarnermut nunalerinermullu naalakkersuisoqarfik.
- Tassanngaannartumillu silarlunnerulertalernerata kingunerisaanik tuttoqassutsip ajalusoorsinnaanera sillimmartaarfiginiarlugu kulavaat piaqqisartut illersorneqarnissaat pisariaqarpoq, taakkumi kulavaat piaqqisinnaasut siunissami aamma tuttoqassutsip attanneqaannarnissaanik qulakkeerinnittuummata, Pinngortitaleriffik allappoq.
AAMMA ATUARUK Sunngiffimmi piniartartut tuttunniarsinnaanerat unittoq
Tuttut amerlassusaasa ikilisinnissaanut aavarfiup – soorlu siornatut sivisunerunissaa, Pinngortitaleriffiup innersuussutigaa.
Tassa piniarfimmi Sisimiut-Kangerlussuarmi, Akia – Maniitsumi, Ameralimmi Qeqertarsuatsiaanilu sunngiffimmi piniartunut aggustip ulluisa aallaqqaataannit oktobarip naanissaanut.
Inuussutissarsiutigalugulu piniartunut sumiiffinni taakkunani aggustip aallaqqaataanniit decembarip naanisaanut.
Akuersissut piniarnermullu allagartaq eqqaamaneqassasoq
Aavarnerup aallartinnginnerani piniarnermut allagartaq eqqaamaneqassaaq. ”Piniarnermut allagartaq” kommunerisap allaffeqarfianut piniarneqarsinnaavoq.
Uppernarsaat uumasunik assersuutigalugu tuttunnik piniarnissamut pisinnaatitsisarpoq.
Aalisarnermut, piniarnermut nunalerinermullu naalakkersuisoqarfiup akuersissut puiorneqarsimanerani akiligassiisoqarsinnaallunilu allanik pineqaatissiisoqarsinnaasoq erseqqissaatigaa.
- Akiligassiissutip tusintillit arlaqartut angusinnaasarpaa, apeqqutaalluni uumasut qassit, uumasoq suna taavalu aalajangersakkat qassit unioqqutissimanerlugit, naalakkersuisoqarfik Naalakkersuisut nittartagaanni allappoq.
