- Siunissaq ungasinnerusoq eqqarsaatigisimaneraat paaserusuttassavarput, Martin Kviesgaard oqarpoqFoto: KNR

Banki: Inuussutissarsiortut akiliisanngikkallarnermik nangitsissasut

Grønlandsbankenip inuussutissarsiortunut akiliinngikkallarnissamik neqerooruteqarnini sivitsorpaa. Coronap ajornartorsiortitsinerani inuussutissarsiortut pisariaqartitsinertik naapertorlugu ikiorserneqarsinnaassapput. Suliffeqarfiulli siunissami ataannarsinnaanera apeqqutaassaaq.

Grønlandsbankenip akiitsunik akiliinngikkallarneq sivitsorpaa, taamaalillutik inuussutissarsiortut aningaaserivimmut akiitsutik akilinngikkallarnissaat periarfissarilerpaat.

Sullitalli ataasiakkaarlugit isumaqatigiissuteqarfigineqartassapput.

- Sullitagut maannakkut ataasiakkaarlugit oqaloqatigalugillu nalilersuiffigisassavagut, Grønlandsbankenimi pisortaq, Martin Kviesgaard, KNR-imut oqarpoq.

Aningaaseriviulli qulakkeeqqaarusutaa tassaavoq sullitat akiliinngikkallarnissamik kissaateqartut, kingusinnerusukkut akiitsuminnik taarsiillutik akiliisinnaanissaat .

- Siunissaq ungasinnerusoq eqqarsaatigisimaneraat paaserusuttassavarput, taamaaliorsimappatalu soorunami akiliinngikkallarnerup sivitsornissaa tamatsinnut pitsaanerpaassaaq, Martin Kviesgaard oqarpoq.

LÆS OGSÅ Grønlandsbanken indfører en lang række nye gebyrer

Aningaaseriviup pisortaa naapertorlugu takornarialerisut hunnorujulikkaat maajip juunillu qaammataani akiitsuminnik akiliinngikkallarsimapput.

Inuussutissarsiortut akiitsutik 80 millionit koruunit missaanniittut akilinngikkallarpaat.

Grønlandsbankeni 3000-it missaanni inuussutissarsiortunik sullitaqarpoq. Taakkunannga 24-innaat maajimi juunimilu akiliinngikkallarsinnaaneq atorsimanngilaat.

Kommentarer