Inuussutissarsiornermut ikiorsiissutit nutaat takornarialerisunut tapersiissasoq

Akunnittarfinnut takornarialerinermillu suliaqartut suliffeqarfiit allat coronavirus pissutigalugu aasaanerata nalaani inniminniiffigineqannginnerusut ikiorniarneqalerput.

Naalakkersuisut inuussutissarsiornermut ikiorsiissutit nutaat suliffeqarfinnut ikiorsiissutaasussat pilersikkaat, tusagassiuutinut nalunaarummi allassimavoq.

AAMMA ATUARUK Turisme i Tasiilaq og omegn er hårdt coronaramt

Inuussutissarsiornermut ikiorsiissutinik aaqqissuussineq akunnittarfiit takornarialerinermillu suliaqartut unnuinermut takornarianut angallassinermut’COVID-19-eqarnerani akikillisaassiititsisinnaanissaannik’ periarfissaqartitsivoq, akikillisaassutillu Namminersorlutik Oqartussanit utertissinnaavaat.

Akunnittarfiup unnuisoqarneranit 500 koruunit tikillugit utertissinnaavai, takornariartitsillunilu angallassisut 300 koruuninik utertitsiffigineqarsinnaallutik – taamaalilluni unnuineq angallatsinnerlu takornarianut akikinnerussalluni.

Takornariat taamaalillutik akunnittarfinnut takornarialerinermillu angallassisunu COVID-19-imut neqeroorut apersuutigisinnaavaat, sullissisulli nammineq akikillisaassanerluni aalajangertassavaa.

Takornarianut sullissisut ullormut angallassinermut ataatsimut taamaalaat Namminersorlutik Oqartussaniit taarsiiffigineqarsinnaapput. COVID 19-eqarnerani sorliit akikilliliivigineqassanersut sullissisup nammineerluni aalajangissavaa.

Inuussutissarsiornermut ikiorsiissutit pioreersut sivitsorneqartut

Inuussutissarsiornermut ikiorsiissutit sulisut peqatigiiffiisa matumani GE, SIK, Nusuka KNAPK-llu oqalliseqatigineratigut pilersinneqarput.

Matumani nunaqavissut nammineq nunagisami sulinngiffeqarlutik angalanissaasa akikinnerulersinnissaat siunertarineqarpoq. Tamanna takornariaqarnermik suliaqartunut suliassaqartitsinerussasoq naatsorsuutigineqarpoq, taamaalilluni suliffeqarfiit aasaanerai pissutsit immikkut unammillernarnerani ikiorneqarsinnaassallutik.

- Naalakkersuisut naammagisimaarlugu maannakkut ikiorsiissutissanik suli allanik saqqummiussisinnaalerput – tamatumuuna takornariartitsinermik inuussutissarsiuteqartunut. 

- Inuussutissarsiortut aamma suliffeqarnermi illuatungeriit pitsaasumik pilersitsiviulluartumillu suleqatigalugit takornariartitsinermik inuussutissarsiuteqartunut siunnerfilimmik ikiorsiinissaq piffissaagallartillugu, aammalu aasaanerani suliaqarfiunerpaasartoq pimoorussamik aallartitsinnagu, atuutsilerparput, inuussutissarsiornermut aatsitassanullu naalakkersuisoq, Jens-Frederik Nielsen tusagassiuutinut nalunaarummi oqarpoq.

AAMMA ATUARUK Danmarkip angalasut takornariallu amerlanerusut ammaassiffigissagai

Naalakkersuisut tamatuma saniatigut inuussutissarsiornermut ikiorsiissutit pioreersut atuunnerat sivitsorpaat, taakkulu aasaaneranit 2020-mi septembarip 30-ata tungaanut atuutissallutik.