Covid-19: Arsaannermi GM nalorninartumiittoq

Nunatta nakorsaanera Henrik L. Hansen marlunngormat nalunaarpoq coronamik tunillaassiasoqarsinnaasoq inunnik amerlasuunik ataatsikkut tunillaasinnaasunik.

Nutaarsiassap tamatuma isikkamik arsaannermi GM-nik aaqqissuisussat isumaliutigeqqitassaqalersippai.

Nakorsaaneq kaammattuivoq corona pissurtigalugu aaqqissuussat annertuut annikinnerusullu naammassiniarnissaat isumaliutigilluarneqassasoq.

- Kaammattuutigaarput inuit katersorsimasut amerlanerpaamik 100-uussasut. Taakkulu akornanni tunillaassiasoqariataassappat Kalaallit Nunaanni sumiiffinni arlalinni ataatsikkut tuniluuttoqalersinnaavoq, Henrik L. Hansen oqarpoq.

Arsaattartut kattuffiata KAKp kaammattuut tusaatissatut tiguaa. Kinguartitseratarsinnaaneq taamaatitsisinnaanerluunniit piviusunngoratarsinnaapput.

Pissartanngorniunnissanut nalunaartut tunumiit kitaalu tamakkerlugu avannamut Upernavik tikillugu angerlarsimaffeqartuupput agguaqatigiisillugulu iligiit 22-nik arsartoqartarlutik.

Peqataasut sapaatip akunnera unammersuariarlutik illoqarfigisaminnut angerlartussaapput.

Akisussaaqatigiinneq

Pingasunngornermi unnukkut ataatsimiinnermi KAKmi siulersuisut nakorsaanerup inassutaa oqaluuseraat.

- GM-mut peqataaniarlutik klubbit nalunaartut tamaasa allaffigaavut erseqqinnerusumik paasissutissiinissatta tungaanut pissartanngorniunnissanut billettisinngikkallassasut, Lars Jørgen Petersen KAK-miit oqarpoq.

Ukioqqortussutsinni assigiinngitsuni pissartanngorniunnissani peqataasut amerlassusissaat pillugit KAK maanna nappaatit tuniluuttut pillugit ataatsimiititaliarsuarmut nassiussivoq.

- Kinguartitsisoqarluniluunniit taamaatitsisoqaratarsinnaavoq. Kisianni oqaatigerusuppara neriuutigigakku pilersaarutaasutut pissartanngorniuttoqarsinnaanissaa ammaffigineqassasoq, Lars Jørgen Petersen oqarpoq.

Inuit katersorsinnaasut suli 100-nut killeqarput. Nunatsinnili arsaaffinni isiginnaartut amerlassusaat nakkutigiuminaappoq. Tamannali pissartanngorniunnissanut akimmiffiusariaqanngitsoq, KAKmi isumaqarput.

- Ullumikkut inassuteqaataasut aallaavigineqarsinnaalluarput. Immitsinnut qanillinaversaarnissarput, eqqiluisaarnissaq maangaannarlu qitserannginnissaq inassutaapput. Tamatta akisussaaqatigiikkutta pilersaarutit naammassineqarsinnaalluarput, Lars Jørgen Petersen oqarpoq.

Nappaatit tuniluuttut pillugit ataatsimiititaliarsuup akissuteqarnissaa maanna KAK-miit utaqqineqarpoq.