Trumpip Kinamik attaveqaqateqarunnaavinnissani sioorasaarutigigaa

USA-p Kinamik attaveqaqateqarnera coronap ajornartoortitsinerani ajorseriarsimasoq, USA-p præsidentia Donald Trump oqarpoq.

Trumpip Kinap præsidentianik Xi Jinpingimik maannangaaq oqaloqateqarusunnginnini nutaarsiassaqartitsivimmit Fox Businessimit apersorneqartilluni oqaatigaa, USA-llu Kinamik attaveqarnera kipineqarsinnaasoq oqaatigalugu.

AAMMA ATUARUK Trumpip coronavirusip tuniluutilerfianik isumaliuutersuutaa WHO-p eqqoriaanertut nalileraa

Kina coronavirusip tuniluutilertunnginnissaanut iliuuseqapallassimannginnera Trumpip pakatsissutigaa, tamannalu USA-p Kinallu niueqatigiinnissamik ukioq manna januaarimi isumaqatigiissusiornerannut ajoqutaalersimanerarlugu.

- Tamaanga killittussaanngikkaluarpugut, Trump oqarpoq.

- Niueqatigiinnissamik isumaqatigiissut atsioqqammiinnarippullu nappaalanersuaqalerpoq, Trump nangippoq.

- Kinap præsidentia Xi maanna oqaloqatigerusuppallaanngilara, USA-p præsidentia apersorneqarnermini oqarpoq.

Trumpip sioorasaarinera Kinami naalagaaffiup tusagassiorfiinit silanngajaarnertut taaneqarpoq. Tuluit nutaarsiassaqartitsiviat BBC taama allappoq.