Innuttaasut qarasaasiatigut allagarsisalernissaat kinguartoq
Innuttaasut nunatsinniittut 15-ileereersimasut tamarmik pinngitsooratik apriilip aallaqqaataaninngaaniit eBoksemut, tassa qarasaasiatigut allagarsiivimmut, atuisunngoreersimasussaagaluarput.
Tamannali pinngilaq.
Kalaallit Nunaanni innuttaasut 15-ileereersimasut tamarmik qaraasiatigut allagarsisalissapput
- Innuttaasut 15-ileereersimasut qarasaasiatigut allagarsisalernissamut atuisunngussapput. Tamanna apriilip aallaqqaataatinnagu pisussaagaluartoq, piffissaligaanngitsumik kinguartinneqarpoq.
- Allakkat soorlu Namminersorlutik Oqartussaneersut kommunineersullu qarasaasiatigut siunissami nassiunneqartalissapput.
- Inuilli qarasaasiamik atuineq ajortut qarasaasiatigulluunniit allagarsisimanerminnik qimerloorsinnaanngitsut, atuilinnginnissamik qinnuteqarsinnaapput.
Tamanna komunalbestyrelsinut qinnutigineqassaaq.
- Inuit Kalaallit Nunaannut atuumassuteqartut nunattali avataani najugaqartut, qarasaasiatigut allagarsisalernissaminnut qinnuteqarsinnaapput.
Tusarfik: Sullissivik.gl, Pisortani Digitalimik Allakkerineq pillugit Inatsisartut inatsisaat nr. 14, 8. juni 2017-imeersoq
Coronavirus ilungersunartorsiortitsimmat pinngitsoornani atuisunngortussaatitaanissaq Digitalimik Sullissivimmiit piffissaligaanngitsumik kinguartikkallarneqarpoq.
- Corona peqqutigalugu suliniutinut anngussinnaajunnaaratta kinguartittariaqarsimavarput, Kathrine H. Nathanielsen oqarpoq.
AAMMA ATUARUK e-Boks atorlugu digitalimik tamanut allagarsiisoqartalissaaq
Kommunit coronamik ajornartoornermi immikkut ilungersunartorsiorput. Suliassallu ilaat ippassaatinnagu naaammassisinnaasimanngikkaat, taanna oqarpoq.
Sulineq nangiqqissaaq
Nunatsinni oqartussat innuttaasullu 15-ilereersimasut eBoksekkut attaveqatigiilersinnissaannik suliaq 2019-imi ukiakkulli aallartippoq.
Oqartussalli e-boksimut attaveqalissanerlutik taamaalillutillu digitalimik nassiussisalissanerlutik namminneq qinigassaraat. Digitalimilli sullissiviup oqartussat attaveqaat nutaaq atoqqullugu kaammattorpai.
AAMMA ATUARUK Soraarnerussutisiassanik katersinngitsoorneq: Allakkat tigusisussanut apuutinngitsut
Innuttaasut ilaat e-boks-imik atuisunngoreersimapput
Innuttaasut inuup normullit tamarmik qarasaasiatigut allagarsiivimmik sanaanneqartarput. Taassuminnga atuisut 17 - 18.000-iupput, Katrine H. Nathanielsen oqarpoq.
Qarasaasiatigut allagarsisarneq Danmarkimi innuttaasunut tamanut novembarip aallaqqaataani 2014-imi atuutilerpoq. Periuseq taanna nunatsinni atorneqassasoq Naalakkersuisut aalajangerpaat.